تجربة سرقة افضت الى تلفيق قضية مخدرات ... حدث بالفعل

اوعوا تفهمونى صح



مش انا اللى كنت بسرق خالص خالص يعنى



ايون انا اتسرقت



وانا راجعة من شغلى فى أمان الله مع واحدة صحبتى



و ماشيين بنتكلم بقى وبنم على خلق الله و اللى حصل فى  الدنيا



و  هوووووووووب الاقى واحد معدى بالموتوسيكل جنبى و راح خاطف الشنطة وجررررررى

ولنا هنا وقفة ..اذ انى اكتشفت انى مش بعرف اصوت و لا اصرخ ولا اقول الحقونى

انا وقفت  و بقول لصاحبتى سرقوا الشنطة و بشاور على الموتوسيكل  وبضحك من الموقف و الخضة

الخضة طبعا معروف ليه  ... الضحك بقى ايه سببه ؟؟

ان الشنطة اساسا كانت فاضية مفيهاش حاجه خالص غير شوية ورق يخص الشغل و البطاقة و كارنيهات

لان الموبايل كان فى ايدى و الفلوس حطاها فى جيبى

طب والله الحرامى صعب عليا ... وكنت عايزة انده عليه اقوله دى فاضية يا عممم خد هنا

وطبعا لانى معروفة ومشهورة و كده  _ ايييييييييييه حد عنده اعتراض و لاايه _ خفت البطاقة يتعمل بيها حاجه

قلت اروح ابلغ عن السرقة و اثبت ان البطاقة راحت في هذة الحادثة المشئومة ...  و على هذا توجهنا انا و صحبتى الى قسم الجيزة

طبعا انا اول مرة ادخل قسم ... فكنت و لله الحمد حاسة ان ركبى بتخبط فى بعض

عند باب القسم العسكرى سألنا داخلين ليه ... قلتله سرقة شنطة ..  راح مطلع معانا واحد تانى شكله مخبر عشان يدخلنا للظابط المسئول

الظابط بكل تناكة سألنا نفس اسئلة العسكرى  ... ايه اللى اتسرق وازاى وفين و امتى وانتى مين و كان فى فلوس و لا لأ  ؟؟ ... و اللى حولنا

بدوره لظابط تانى عشان يكتب المحضر اللى برضو سأل نفس  الاسئلة اللى فوق و اللى برضو حولنا على ظابط تانى عشان يكتب

المحضر  ليه بقى ؟؟؟

لنا هنا وقفة اخرى  بس دى وقفة خيبة ... عشان الظابط دا كان بيكتب محضر قضية مخدرات  و المتهم اصلا مش قاعد ... الظابط معاه بطاقة لشخص ما و قاعد بيكتب بياناته و بيكتب المحضر  ... و هو بيكتب المحضر  و اثناء ما احنا قاعدين منتظرين ظابط يكتب لنا محضر السرقة ... دخل ظابط تانى اعتقد هو المسئول عن قضية المخدرات و وقف يتفق مع الظابط اللى بيكتب المحضر على طريقة الكتابة  و تلبيس التهمة لصاحب البطاقة

الظابط اللى بيكتب المحضر : ماتقلقش يا باشا انا عندى كام صباع حشيش كدا هظبطهولك

الظابط صاحب القضية : لو عندك اتنين كدا حطهم

الظابط اللى بيكتب المحضر : يا باشا وعندى اكتر لو عايز

الظابط صاحب القضية : لا اتنين كفاية ... بس توريهمولى الاول عشان اتأكد من الوزن بس عشان يبقى مطابق للمحضر

الظابط اللى بيكتب المحضر : ماتقلقش يا باشا 

الظابط صاحب القضية : تعالى بقى اقولك هتكتب ايه

يقفوا عن باب المكتب و يكلمه بصوت واطى شوية  بس مسموع ليا لانى كنت قاعدة جنب الباب

الظابط صاحب القضية : انت هتكتب  اننا اثناء تفتيشه وجدنا جسم صلب وخشينا ان يكون مطواة _ اتك اوى ع الكلمة دى و شدد

عليه انها تتكتب معرفش ليه _ و اننا لما اخرجناه وجدناه انه حشيش كذا كذا و انت عارف الباقى بقى

مضيت على المحضر بتاعى ومشيت  .... لما خرجت اتصل بيا احد زملائى فى العمل ان  فى ناس لقوا الشنطة مرمية على جنب

ولكن  غطى ما حدث داخل القسم على فرحتى برجوع الشنطة



نطلع من اللى فوق دا بحاجتين

اولا : انى لازم اتعلم اصووت و اقول الحقونى يا ناس

ثانيا :: ان مصر قبل 25 يناير هى نفسها مصر بعد 25 يناير للاسف 




تعليقات

‏قال فاتيما
يا لهوى
الحمدلله انك بخير
وطلعتى كويسة م القسم
وما ذكرتيه حقيقة واقعة
الداخلية هيا هيا ...
بلطجية
ومفترية
و .......... كلام تمنعه الروقابة

:)

حمدلله على سلامتك
و انا زيك كدا تمام
فلوسى والنوبايل ف جيبى
بس انا أشطر بقى ورقمى القومى ف جيبى برضو عشان اللجان الشعبية ولو حصل اى حاجة ف أى وقت اروح مطلعاها علطول
اما الشنطة فلو اتسرقت مفيهاش حاجة مهمة خالص ويبدو ان دا المفروض يحصل من هنا ورايح ...
الشنط للعياقة زى زمان
واللى عاوز يسرقنا بقى
يلطشنا كلنا على بعضيشنا كدا
وطبعا ساعتها هيفكر الف مرة
ويقول بلااااااش اجيب لروحى نصيبة
وهيعيط ويقول روحى يا مدام وموش عاوز حاجة منك تاخدى فلوسى وموبايلى عاااااااااااااااااااا


صباح الورد
وحمدلله ع السلامة يا حبات اللولى
‏قال جارة القمر
هههههههههههههههههههههههههه ضحكتينى يا فاتيما الهى ربنا يفرح قلبك .... يسرقونا ايه بس ... كدا نبقى ضمنا ان الحرامية يقلوا فى البلد

انا كان نفسى اقولهم كلام تمنعه الرقابة برضو بس خفت اتشد من قفايا على التخشيبة

تصدقى فكرة برضو الرقم القومى يبقى فى جيبى برضو ...و على هذا ممكن مش اجيب شنط و دا افضل لانى اصلا مش بحبهم
‏قال ريـــمـــاس
صباح الغاردينيا جارة القمر
ههههههههههههه
معليش بقى انا داخله عندك ومن اولها بضحك اتخيلت منظرك وانتي واقفه محتارة هو الحرامي خطف ايه ؟؟
بس بجد شاطرة طالما المبايل والفلوس معاكي :)
ربنا يحميكي من كل شر
لروحك عبق الغاردينيا
كانت هنا
reemaas
عندك حق اكيدالحال هو هو ماتغيرش
طالما النظام ماتغيرش يبقي الفساد هيفضل زي ما هو

و الحمد لله ان موضوع السرقةعدي علي خير حظوظ برده :)

موضوع مهم ان الناس تقراه وشجاعة منك انك حكيتي الواقعة اللي مفروض تكون سرية وخاصة ان في ناس كتير بتخاف تقول حاجات اتفه من كده بكتيير

بس ده ما يمنعش ان في احتمال ان كتاباتك توحشنا قريب :) :)
‏قال جارة القمر
ريماس

صباح البنفسج ... ولا يهمك اضحكى طبعا انا نفسى بعد الموقف قعدت اضحك
وصعب عليا الحرامى عشان هيلاقيها فاضية

شرفنى مرورك :)
‏قال جارة القمر
صاحب الحبر الاسود

هههههههههههههههههههه ايون فعلا احتمال بس اهو الواحد يغير جو برضو

تصدق انا كنت بقول انشر البوست ولا اشيل الحوار اللى يودى فى داهية بس ... بس توكلت على الله و نشرته و اللى ربنا عايزه يكون

شرفنى مرورك :)
‏قال الازهرى
لنا عمر واحد
ياخده رب واحد
فى وقت واحد

ولو جالك زوار الفجر
ولا تعرفينى

الندالة أدب

ولو حد منهم سألنى هأعترف بكل حاجة من يوم ما دلت التدوين
لحد ما سمعتك بتتآمرى على قلب نظام الحكم


حمد لله على السلامة
‏قال جارة القمر
الازهرى

ههههههههههههههههههه هى دى اخلاق ولاد البلد فعلالالالالالا

انت قلت الخلاصة

لنا عمر واحد
ياخده رب واحد
فى وقت واحد


عمر الشقى بقى يابنى ... بس بلاش تعترف عليا الهى يخليكى
ايه ده و حصل امتى و ازاي؟
هي الداخلية دي مش هتنضف؟
الحمد لله انك بخير و تمام
يا رب دايما تكوني بخير بس كده احنا محتاجين ثورة جديدة
شدي حيلك بقى
الجمعة الجاية جمعة شنطتك
‏قال جارة القمر
مصطفى سيف الدين

من اسبوع او اتنين مش فاكرة والله يا بنى ... الله يسلمك من كل شر

لا طبعا مش هتنضف الا لو اللى مسكينها نضفوا الاول

هو انا الشنطة تتسرق و كمان هانزل الجمعة ... انا هعمل كل حاجه ولا ايه
انتوا عليكوا الجمعة بقى
هههههههه تعيشى وتاخدى غيرها

طيب ليه مش اتصلتى كنت جبتلك عيش وحلاوة

عموما الف حمدالله على السلامه

تحياتى
‏قال جارة القمر
جايدا العزيزى

ههههههههههههههههههههه انتى فرحانة فيا كمان ... مااااشى ماااشى

لا بلاش حلاوة ... ممكن اتواضع و اوافق على كباب مافيش مشكلة

تسلمى من كل شر :)
‏قال Bent Men ElZman Da !!
للاسف فعلا ده اللى بيحصل
الثوره كانت مش لازم تغير نظام ورئيس بس
كمان كانت لازم تغير منظومه الشرطه دى كلهااااااا
الحمدالله انك كويسه والشنطه اللى مش فيها حاجه رجعتلك هههههه
وعلمتينى والله ان احط الحاجات المهمه فى جيبى
اللى عايزها يسرقنى انا بقى ونبقى نشوف هيحصله اييييه

الحمدالله انك بخير :)
مبسوطه انى عرفت مدونتك بجد :))
‏قال جارة القمر
بنت من الزمن دا

انا مبسوطة اكتر بجد انك شرفتينى بمرورك و تعليقك

بالنوسبة للثورة فتقريبا هى كانت لازم تغيرنا احنا كلنا كدا ع بعضنا

ايون و طبعا فكرة انه يسرق واحدة على بعضها كدا هيرجعنا لقول فاتيما انه مش هيجيب لنفسه نصيبة ههههههههههه

اسعدنى جدا مرورك :)
‏قال بدر
الف حمد لله على السلامة بجد زعلت جدا ربنا يسترها معاكي ويحميكي يارب
‏قال جارة القمر
بدر

شكرا جزيلا :) الله يسلمك

المشاركات الشائعة من هذه المدونة

مقتطفات اعجبتنى २ - شهرزاد الخليج

الرجالة دول جزم بس المشكلة ان الستات مابتعرفش تمشى حافية!!!!!!