الأحد، 30 مايو، 2010

سمعونا زغروووووووووووطة حلوة


اسمع زغروطة الاول احسن مش هقول الخبر الحلو اللى عندى

فيييييييين ؟؟؟ مش سامعة حااااااااااااااجه يا جدعان دا خبر الموسم

لولولولولولولولىىىىىىىىىىىىىىىى

لولولولولولولولىىىىىىىىىىىىىىىى

لولولولولولولولىىىىىىىىىىىىىىىى

ايون كدا جدعااااااااااااان

مين خطب بقى ؟؟؟ ايه دا ماحدش عارف كدا برضو

هو اى نعم قالى خليها فى سرك بس انتوا طبعا عارفين ان البير بتاعى مخروم

قلت مابدهااااااااااااااااش بقى لازمن و حكمن ولابد افضحه على بلوجر عشان كل الناااااااااس تعرف

ها حد عرف ؟؟؟ انا شايفة واحد هناك بيرفع ايده .... لالالا غلط اقعد

طب قول انت .... لا برضو غلط اقعد

طب اغششكم بس اوعوا حد يقول ان انا اللى قلت اوعووووووووووا احسن يضربنى ولا حاجه ههههههههههههههههههه


اللى عمل العملة دى و خطب يا جدعاااااااااااااااااان


هو












هو










هو










هو








تعالوا بس وراكم ايه
















ايون هو و كان عايز يخبى وانا قلت ابدااااااااااااااااااااااا لازمن نفضحه على بلوجر عشان يعرف ان الله حق هههههههههههههههههههههههههه

الف مليون مبرووووووووووووووك يا شريف وربنا يتمم على خير يارب ونشوفك فى الكوشة قريب كدا ونفرح فيك مش هقول اسم العروسة عشان شريف حمش مش بيحب اسم خطيبته على الملأ كدااااااااا بس هقولها الف مبروك يا جميلة و ربنا يتمم لك على خير يارب

يلا بقى ادخلوا باركولهم و زى ما اتفقنا اوعى حد يقوله ان انا اللى قلت شششششششششش خليها فى سركم بقى
ونسمع اغنية الخطوبة الشهيرة جدااااا
والله و عملوها الرجالة و رافعوا راس مصر بلدنا
لالالا مش دى يا ناس كسفتونا
يا دبلة الخطوبة عقبلنا كلنا
و نبنى طوبة طوبة فى عش حبنا
ايون هى دى يلا سلام قبل ما يعرف ان انا اللى قلت

الجمعة، 28 مايو، 2010

منتهى الحياة


كان يتمنى لقاؤها ... صافية حنونة ... كان يتمناها سماءا يكون معها المنتهى

كانت تتمنى لقاؤه ... غيورا و حبيبا مجنونا ... كانت تتمناه بحرا يكون معه المنتهى

وكان اللقاء !!!!

هناك بعيدا

هادئا احيانا و صاخبا احيانا اخرى

لم يستطع احدا منهم ان ينكر ان لقاءهم

كان المنتهى لهم

منتهى الفرحة

منتهى الجنون

ولكن ...

خرجت الشمس عليهما فجأة

وقررت ان تعلمهما ان هناك منتهى أخر لا يعرفانه

واطلقت اشاعتها لتبخر مياهه

فكان لقائهما

منتهى الحياة ايضا

الثلاثاء، 25 مايو، 2010

ايزيس - هشام الجخ

هشام الجخ

شاعر بجد قصايده حلوة اوى

القصيدة دى عجبتنى قلت تسمعوها معايا

ايزيس

الجمعة، 21 مايو، 2010

سأظل أنا


سأظل انا

التى عرفتها منذ زمن بعيد

لن اتغير

ستظل ابتسامتى مرسومة

ساحاول جاهدة ان تكون من القلب

من المؤكد سيأتى اليوم التى تخرج فيه من القلب

رغم جراحه

سيظل قلبى صافيا نقيا

ستظل روحى طفلة بريئة مدللة عنيدة

ما العيب فى ذلك ؟؟

لست مضطرة ان أكون مثلهم

سيظل قلبى يرى الناس بأحساسه
حتى وان رأى بعضهم ان ذلك عيبا
وان الاحساس لا يكفى
ولكن هذا انا ... ارى بأحساسى


ياربى احتاجك اكثر من اى وقت مضى

أثق انك معى ... فأنت رب العباد

حتى وإن اخطئوا

الاثنين، 17 مايو، 2010

الطريق الى عتليت


ليه نقبل الهوان ؟؟؟ ليه نقبل بيه و نسكت و نقول سلام؟؟

دعوة الى كل من لا يعرف ما حدث لاسرانا فى العدوان الثلاثى و النكسة

الى كل من يدافع عن اتفاقية كامب ديفيد

الى كل من يدافع عن موقف العرب السلبى اتجاه اسرائيل


اتفرجوا على ذلنا و المهانة اللى اتعرض ليها ولادنا واخوتنا و نساءنا

مافيش بيت فى مصر مارحش حد منه فى الحرب

شهيد و اسير و مفقود

يا ترى فين حقهم من جرائم اسرائيل؟؟

ليه نسكت احنا عن اى حاجه بيعملوها ضدنا وهما مش يسكتوا عننا

يعنى ايه جرائم تسقط بالتقادم!!!!

فى شرع مين تقتل عزل من السلاح

فى شرع مين تقتل اطفال و نساء

ليه لما انضرب كذا ضابط مصرى على الحدود من اسرائيل كل اللى عملناه تقبلنا اعتذارهم وان ماكنش قصدهم

فيييييييييييين السلام اللى بيقولوا عليه دا

وليه نسيب احنا حقنا ... من المهندسين اللى فى الحرب فى الفيديو قال وهو فى الاسر مد واحد ايده واخد النظارة بتاعته وهو لحد دلوقتى زعلان عليها ........ ليه ؟؟؟ قال عشان دى كان شئ يخصه

صعب حد ياخد حد حاجه بتاعتك تخصك وانت مش تدافع عنها ...... دا يبقى جبن و استسلام

دا زعلان على نظارة اومال الارض !!!!

فى الفلاحين الارض عندهم عرض .... اه عرضهم لو حد زمان كان بيبع ارضه كان بيبقى عار عليه

لانه باع عرضه ... وبما اننا بنتكلم عن اسرائيل واللى عملته

كنا فى اجتماع لاعضاء الكنترول واثناء الاجتماع ذكرنا استاذ راضى أن

"الخامس عشر من مايو كان قيام دولة اسرائيل "

يااااااااااه يعنى اسرائيل دولة من اتنين و ستين سنة

اتنين و ستين سنة عذاب وقتل وتدمير و خداع وسلام مزعوم مالوش اساس من الصحة

اتنين و ستين سنة مذلة و هوان مافيش حد قام و قال دا ظلم ولازم ناخد موقف

اتنين و ستين سنة بنتخانق على ماتشات الكورة و الدورى و مين كسب و مين خسر

اتنين و ستين سنة بنتفرج على الاطفال و الاعراض التى تهتك فى التليفزيون ولا تهتز لنا شعرة

نشجب و نعترض ثم نسكت و نعود الى حياتنا دون حراك

حد سأل نفسه هو ليه اسرائيل قدرت تحافظ على دولتها كل الوقت دا ؟؟؟

عشان ضعفنا وسكوتنا ولا عشان هما عرفوا يخططوا صح و مشيوا فى طريقهم

انا متأكدة ان النصر قريب أكييييييييييييد .... بس لما ننصر نفسنا الاول

بس السؤال الاهم احنا ليه راضين بالهوان ؟؟؟؟؟

اتكلموا يا مدونين .... يا ناس عرفوا ولادكم و اخواتكم مين اسرائيل و فين حقنا و مين اخد حق التانى

البداية من عندنا ... خد ابنك واقعد معاه وقوله حقه فين و ان عرضه هو ارضه

ماينفعش يسابها للكلالالالاب تعربد فيها

البوست مفتوح لاى حد عايز ينقله او يكتب عن الكلام دا

دعوة مفتوحة لكل الناس اللى لسه عندها ضمير

مش عايزين نسكت ودا اضعف الايمان

الجمعة، 14 مايو، 2010

يوم واحد تكون انسان


جربت يوم تكون انسان ؟؟؟

انسان بجد من اللى خلقهم ربنا ... فيها ايه لو جربنا يوم نكون كدا

يوم واحد بس ... السابع عشر من مايو

هنكون فيه بنى آدمين ... هنعيش حياتنا بس من غير فساد

قوم اليوم دا واتوضى وصلى ركعتين لله بنية التوبة عن اى حاجه عملتها

وانزل روح شغلك وانت ناوى تكون مخلص لعملك بجد
ما تقبلش رشوة ولا تقبل ترشى حد

وانت ماشى لو شفت حد بيرمى حاجه فى الشارع قوله لأ كدا غلط ماتسكتش

دى حياتنا احنا اللى نمشيها مش هى اللى تمشينا

الموضوع مش حكومة ولا الفساد اللى فوق .... الموضوع موضوعنا احنا

جرب تكون يومها صادق مع نفسك و قولها "دا مايرضيش ربنا"

جرب لما تكون راكب مترو و شفت ست كبيرة و تعبانة من الوقفة قوم لها واقعدها

ساعد حد محتاج مساعدة

افتح دولابك وطلع حاجه مش عايزاها واديها لحد محتاجها

افتح قلبك و شيل كل نقطة سودا جواه و خليك يومها بقلب ابيض صافى اوى من جواه

لو زوجة حاولى ترضى زوجك .... امنعى ابنك من حاجه غلط بيعملها

لو زوج ارضى زوجتك و اتذوقلها زى ما هى بتتذوقلك

لو طالب ذاكر بجد ... سيبك من اى حاجه تانية شاغلة دماغك

لو كنت مرتبط ببنت ومعلقها معاك ارضى ربنا و حافظ عليها وبلاش تضحك عليها بكلمتين انت مش حاسسهم

لو كنت مدرس ادخل حصتك وانت ناوى تعلم ولادك و تربيهم مش داخل عشان تخليهم ياخدوا دروس عندك

تيجى نجرب ناخد بكلام د/ عائض القرنى

"لليوم فقط سأعيش فأغرس فى قلبى الفضيلة وأجتث منه شجرة الشر بغصونها الشائكة"

تيجى ما نحسدش ولا نتكبر ولا نكدب ولا نخون ثقة حد فينا

تيجى نقف وقفة مع نفسنا فى اليوم دا ... اليوم دا بس

نعمل فيه اللى يرضى ربنا بجد ... ابقى انسانة و تبقى انسان

يا ريت اى حد شايف ان الوقفة دى احنا محتاجينها يكتب عنها عنده فى المدونة او الفيس بوكأو حتى يتكلم عنها مع اصحابه

صاحب الحملة مدونة هنعيش يعنى هنعيش

الثلاثاء، 11 مايو، 2010

عندما يعلن قلبك العصيان


عندما يعلن قلبك العصيان

تقف الابتسامة حائرة

من اين تخرج و كيف؟

يغلق قلبك امامها الابواب

فلا طريق للدخول اليه

أتتركه حزينا ؟؟؟

حسنا ذلك ما يريد

ترجع الابتسامة مرة أخرى الى مكانها على الشفاه

فيسألها الجميع ... لماذا لم تبقى معه ؟

فترد بأبتسامة باهتة ... لقد أعلن القلب العصيان

فهو لا يريد الابتسام ولا النسيان

الأحد، 9 مايو، 2010

حسبى الله و نعم الوكيل

ازيكم ازيكم كلكم على بعضكم ؟؟؟؟ كويسين ... طويب تمام خالص
انا اتفرست انهارده فرسة جامدة جدا الصراحة وقلت افرسكم معايا ممكن ؟
ايوووووووون ممكن انا مش ديموقراطية خالص على فكرة يعنى هتتفرسوا هتتفرسوا
من شويتين كنت بتفرج على برنامج العاشرة مساءا ولقيت ان البرامج يتم اذاعته من لندن
وربنا يبارك فيه المذيعة حبت تقولنا اننا مش فاهمييييييين حاجه فكان الاتى
انها عملت لقاء فى احدى المدارس فى لندن للتعرف على فهم الطلاب لعملية الانتخاب وهل هم على دراية بأهميتها أم لا ؟
تتوقعوا ايه ؟؟؟؟ هحكيلكم
اولا ادارة المدرسة اصرت فى بادئ الامر ان تلقى اسرة البرنامج نظرة على من تخرجوا من المدرسة و حصلوا على جائزة نوبل!!!!!
ثانيا التلاميذ اللى اخدت المذيعة رأيهم كانوا على دراية كاملة بأهمية الانتخاب ونزاهته رغم اعترافهم ان الحكومة لها اخطاءها ولكن اخطاء ليست فادحة جدا
ثالثا تحدثت المذيعة مع احدى المدرسات وكيفية تلقين التلاميذ أهمية الانتخاب فكان رد المدرسة انهم يقومون بعمل شكل مصغر لانتخابات فى المدرسة حيث يتم اختيار مجموعة يمثلون الاحزاب و عليهم عرض برنامجهم الانتخابى و على التلاميذ اختيار من يحبذونه من بينهم
اتفرستوا ولا لسه ؟؟؟؟ طب استنوا عشان الفرسة تكمل
فى أحدى المدارس فى مصر يجلس مجموعة من المدرسين عشان يشربوا حشيش فييييييييين ؟؟ فى المدرسة ... ايون صدق او لا تصدق
بيشربوا حشيش فى المدرسة ... وواحد زميلهم صورهم و ارسل الصور لادارة وم احالة المدرسين للتحقيق
مش لاقيه تعليق على الكلام الصراحة ... يا ترى العيب فين ؟؟
شوفتوا ان المدرسة بتخرج ناس تاخد جائزة نوبل ... احنا مدارسنا بتخرج ناس عشان تقف على الناصية (مع الاحترام طبعا للمدارس المحترمة )
أن تنشأ جيلا قياديا ليس سهلا كما يظن البعض ...فالجيل مثل النبتة الصغيرة تحتاج ماءا كثيرا حتى ترتوى و عندما تكبر تعطى بلا مقابل
عليك ان تذرع داخلهم من صغرهم ان لهم أهمية لا تقل أهمية عن المحارب فى الميدان
الموقفان الذين سبق وذكرتهم اسكتوا لسانى عن الحديث

الخميس، 6 مايو، 2010

فَصَبراً جميلاً واللهُ المُسْتعانُ على ما تَصِفُوْنَ


"فَصَبراً جميلاً واللهُ المُسْتعانُ على ما تَصِفُوْنَ"

الأحد، 2 مايو، 2010

شارع المعز

فضلت قاعدة ادام الشاشة كتير وفاتحة صفحة رسالة جديدة على المدونة
واكتب كلام و امسحه و اكتب وامسح ... كنت عايزة افضى اللى جوايا
وبعدين قلت ايه ذنب الناس بس ؟؟ هما متنكدين لوحدهم مش ناقصة نكد زيادة عليهم
فتحت المصحف وقرأت سورة مريم وهديت شوية
افتكرت ان الدراسة الميدانية لشارع المعز جبت الصور بتاعتها اخيرااااااااااااا بعد طول انتظار
الصور دى كانت منحوسة ولا ايه كل ما اجبها على فلاشة تبوظ ... بس ماحدش يجى يقولى
الجهاز باظ لما فتحت الصورويطالبنى بجهاز هدية اه انا قلت اهو الصور شغالة على الفلاشات تبوظها ماشى لكن مش الاجهزة هههههههههههههههههه
هحكى عن الدراسة دى واحطلكم صور ليها ... هحكى لانى كنت اتمنى افرج الصور دى لحد عزيز عليا اووووووى
لكن ربنا مش اراد و مبقاش ينفع خلاص كنت اتمنى يبقى هنا ... المهم نبدأ على بركة الله
بصوا بقى كان عندى مدرسة معايا فى شغلى الاولانى هى صراحة اللى ادتنى فكرة الدراسة دى ميس زينب ربنا يبارك فيها يارب
المهم فكرت انى انفذ الفكرة فعلا وبدأت اعرض على ادارة المدرسة وتفضلوا مشكورين بالموافقة ... طبعا مدرستى اسمها زهراء الاندلس
ادخلوا على موقعها لو حد عايز يتعرف على نشاطتها اكتر
بعد موافقة المدرسة جاء دورى انا بقى ... اصلا انا بعيد عنكم لا افقه شيئا فى شارع المعز اه و الله ماكنتش اعرف ولا حاجه هناك الا لما روحته زيارة مع الكلية بتاعتى ايام سنة تانية ولفيناه ولم يعلق فى ذهنى الا معلومات قليلة اللى هى اسماء الاماكن و بعض المعلومات عنها فقط وماكنش ينفع انزل بالمعلومات دى مع تلاميذى فقررت انى انزل المكان و اعمل دراسة فاحصة ماحصة للمكان قبل نزولى مع الولاد
وقد كان اخدت معايا بابا و اختى مرة و لبنى و نسمة مدرسات معايا و صحابى مرة تانية وزرت الاماكن اللى انا عايزاها و درستها كويس
وجاء يوم الدراسة كان يوم السبت السابع عشر من ابريل



دى البوابة الصالحية انشأت فى عهد الملك الصالح نجم الدين ايوب

دى قبة الملك الصالح نجم الدين ايوب انشأتها زوجته شجرة الدر تخليدا لذكراه القبة بتحتوى على ضريح الملك و قاعة واحدة كانت مخصصة لتدريس المذهب المالكى

دى بوابة مجموعة السلطان الناصر محمد بن قلاوون والمجموعة بتضم مدرسة و بيمارستان (مستشفى) مسجد وضريح
كان الناصر محمد قد خلع من حكمه بفعل الملك العادل كتبغا وبدأ فى بناء هذة المجموعة الذى تولى فترة ثم عاد الناصر بن قلاوون مرة اخرى للحكم ... ثم حدثت حادثة اشتباك بين المسلمين و المسيحين و قام الناصر محمد باطلاق جنوده للسلب و النهب فما كان منه الا ان استكمل بناء تلك المجموعة تكفيرا عن فعلته بناءا على وصية الشيوخ له

دى صورة المدرسة التابعة لمجموعة السلطان قلاوون وهى عبارة عن صحن مكشوف و اربع ايوانات الجزء اللى الولاد و مستر محمد قاعدين عليه دا كان سبيل المياه اللى موجود فى الصحن المكشوف وكان بيستخدم فى الوضوء و الحجرات الصغيرة اللى وراهم دى كانت حجر التعليم زى الفصول دلوقتى و الدور التانى من المجموعة كانت مخصصة كمنازل لطلاب العلم و العلماء فى المدرسة



ودا ايوان القبله ( ايوان يعنى المبنى الذى يقام على اربعة اعمدة و يكون الضلع الرابع مفتوح ) وبيضم المنبر وهو اكبر ايوانات المدرسة و المسجد

دى بقى البيمارستان الخاصة بالأمراض العقلية و العظام الجزء دا الغرف اللى كانوا بيحطوا فيهم المرضى النفسيين

ودا الجزء الخاص بمرضى العظام
دى خانقاه و مدرسة السلطان برقوق ...السلطان برقوق قبل وفاته طلب ان يدفن فى هذا المكان فقام ابنه ابو السعادات فرج ببناء هذة المجموعة وتضم مدرسة و ضريح و سبيل مياه و خانقاه ( استراحة ) للصوفيين و طبعا بناءها على نفس الطراز عبارة عن صحن مكشوف و اربع ايوانات ... اللى فى الصورة دا ايه ؟؟؟؟ ايون ايوان القبلة وفيه منبرين المنبر الخشبى اللى ورا دا و منبر حجرى اللى هو من الرخام الابيض دا و المنبر الخشبى الى بناه هو السلطان قايتباى صاحب قلعة الاسكندرية

وكالة بازرعة ... ايون ماحدش يضحك هى اسمها كدا ... الوكالة كانت زى مول تجارى لبيع الاخشاب تم بناؤها فى القرن الحادى عشر الهجرى - السابع عشر الميلادى على يد احد تجار المغرب اسمه حسن كتخدا ويلقب بكخيا عشان كدا اطلق على الوكالة اسم كيخيا فى الاول و فى القرن التاسع عشر الميلادى اشتراها محمد بازرعه تاجر من اليمن و اطلق عليها اسمه و اصبحت الوكالة خاصة ببيع الصابون و التومباك ( نوع من المعسل ) عشان كدا الشارع اللى موجودة فيه الوكالة اسمه التمبكشية نسبة للتومباك و الشيشة اللى كانت بتصنع فى الشارع دا وحتى الان على فكرة ... الوكالة الدور الارضى منها مكونة من خمسة و عشرين حاصل ( مخزن ) اللى هو الابواب الصغيرة اللى تحت دى اما الدور الاول موجود فيه خمسة و عشرين محل تجارى لعرض البضائع ... الادوار اللى بعد كدا بقى مكونة من فيلات حوالى تسعة عشر فيلا اللى هى المنازل يعنى لان التاجر ماكنش بيجى لوحده كان بيجى مع اسرته لان التجار كانوا من الدول العربية فكانوا بيجوا يقعدوا كتير .... كل بيت كان بيبقى ثلاث طوابق ... طابق للاستقبال و الثانى للاطفال و الخادم و الثالث للزوجة ... اللى عجبنى اوى انهم كانوا عاملين حجرة صغيرة كدا تستعمل كثلاجة لانها بحرى و الهوا فيها شديد فكانوا بيحفظوا فيها اللحوم و الخضار بتاعهم و الحجرة دى خاصة بالوكالة كلها يعنى مش فى كل بيت

دا بقى بيت السحيمى ... البيت دا من جزئين موصول بينهم بالجزء الخشبى اللى فى النص دا فى الصورة البيت مسمى على اسم اخر سكانه محمد امين السحيمى صاحب رواق الاتراك فى الازهر البيت مكون من طابقين الارضى منهم اسمه السلاملك عشان استقبال الرجال اما الدور الثانى اسمه الحرملك لاستقبال النساء

دى بعض الادوات اللى لاقيناه فى بيت السحيمى وكانت فى غرفة استقبال النساء عبارة عن مكواة و اله لطحن البن

بس كدا خلالالاص طبعا اللى هيدخل هنا هيدعى عليا لان البوست طويل اوووى معلش خليها عليكم بقى