الجمعة، 26 مارس، 2010

براءة أطفال

طول السنة جوابات جوابات لحد ما مصلحة البريد هتشتكى قريب ... طبعا الجوابات دى من بناتى فى المدرسة من سن ست سنوات و انت طالع ببقى فرحانة بيهم اووووووى لما بنوتة تيجى تقولى يا ميس الجواب دا ليكى
افتكرت دلوقتى موقفين كانوا بجد جامدين جداااااااا ... يوم كنت داخلة الفصل و تقريبا كنت غايبة قبلها بيوم لقيت البنات فى الفصل رسموا ورد على السبورة و كتبوا بنحبك يا ميس مى بجد كنت فرحانة جدااااااااااااااااا ... الموقف التانى كنت فى فصل سنة رابعة ابتدائى بنات
وانا مطلعة مجموعة من البنات يمثلوا ادوار زى الانسان المصرى قديما و بعد ما مثلوا و دخلوا لقيت بنت راحت رافعة ايديها عشان عايزة تقول حاجه انا افتكرت انها عايزة تسأل سؤال ... لقتها قالتلى "أنا بحبك اوى" يا نهااااااااااااااارى حتة موقف بجد روعة جدا
دى شوية صور للجوابات اللى جتلى و صورة احلى هدية حبتها فى عيد الام


دا برفان جالى كهدية عيد الام انا وقعت فى غرامه من أول نظره ليه بقى سؤال وجيه لانى بحب اللون الموف بكل درجاته و البرفان دا فيه كل درجات الموف من اول العلبة الخارجية حتى لون الغطا بتاع الزجاجة .... باقى الهدايا عبارة عن اطباق و كوبايات شكلهم كانوا بيجهزونى و انا مش واخدة بالى ولا ايه




طبعا ماحدش يتريق على الكلام لانهم اطفال لسه مش بيعرفوا يكتبوا اوى ... اه صحيح انا عجبتنى الوردة اللى فى الاخر دى
حسيت ان البنت اجتهدت انها تعمل حاجه كبيرة
على هامش الحفل :
دايما بيقولوا ان الشخص اللى الاطفال تحبه اوى يبقى اكيد قلبه طيييييييييب جدا و حنين ... يا ترى دا صحيح ؟؟
رغم ان فى اوقات الاطفال مش بتحب شخص معين اوى لكن هو طيب جدا برضو ... ليه دايما بنريط بين الاطفال و الطيبة
طبعا الاطفال عندهم من البراءة ما يكفى انهم يحسوا بطيبة الانسان اللى ادامهم لكن مش بالضرورة يبقى حبهم مقياس للطيبة و الحنية
حد عنده تفسير للموضوع دا ؟؟

الجمعة، 19 مارس، 2010

المعلم ليس مادة علمية فقط

هل المعلم مادة علمية يدخل يلقيها على الطلاب ؟
و يفهمها الطلاب و يحفظونها و هكذا تكون مهمته انتهت ؟
فى النصف الدراسى الاول طلب مننا كمدرسين للصف السادس الابتدائى
ان نضع خطة للوصول بالطلاب الى مستويات على مستوى المحافظة
واخذنا نبحث و نتناقش كثيرا حتى توصلنا الى عمل معسكرات فى ايام الاجازة
و حل تدريبات اضافيه مع الطلاب المتفوقين و غيرها من الاقتراحات
ما لفت نظرى فكرة تقدم بها احد الزملاء و هى "التبنى العلمى "
ويقصد بها ان يتبنى أحد الطلاب فى كل شئ ثقافيا و اخلاقيا
بمعنى اصح عمل دراسة متكاملة عن الطالب الذى تبناه
هواياته و قدراته العلمية ॥ ما يحب وما يكره و هكذا
توقف ذهنى عند هذه الفكرة
ولكنى لم انتبه لها كثيرا فى ذلك الوقت
ما أثارها داخلى مرة اخرى ما تعرضت له الايام الماضية
منذ اسبوع تقريبا دخلت حصة احتياطى فى فصل اولى اعدادى بنات
وصادف ان تطور الحديث لطبيعة المرحلة التى يمرون بها
وأخذت اتحدث معهم و لاحظت اسغرابهم أننى اوصف ما يمرون به بالفعل
وما يحسونه و يشعرون به ... بعد خروجى من الحصة طلبت احدى تلميذاتى
الحديث معى فيما يخصها من شئون و صرحت انها تثق بى و طلبت رأيى
فوعدتها ان اساعدها اذا توجب على ذلك
و اعتقد انكم توقعتم ما تريد الحديث عنه ... انه هو ॥ الحب
تكلمنا سويا كثيرا عن هذا الامر و بدأت البنت تقتنع ان احساسها ليس حقيقيا بالفعل
بعدما انهيت الحديث معها توجهت الى وكيلة المدرسة و طلبت منها ان نقيم ندوة
لطالبات الاعدادى و نحضر أحد المتخصصين للحديث معهم عن طبيعة مرحلة المراهقة
وكيفية التعامل مع ما يمرون به فى ذلك الوقت
ما أثارنى فى هذا الامر عدة نقاط :
اولا : ان المعلم لا تنتهى مهمته عند حدود ما يدرسه وان هناك ضرورة فى بعض الاحيان ان تتحدث مع ابنائك حوارا مفتوحا
بدون قيود ولا حواجز تطلق لهم حرية التعبير عن أنفسهم و ما يشعرون به حتى أن كانت حرية التعبير تشمل رأيهم فيك انت شخصيا
فالمعلم مكانته مثل مكانة الاب و الام فى المنزل ... بالاضافة الى أن فكرة التبنى العملى التى ذكرتها سابقا تساعد كثيرا فى فهم التلاميذ و اى المداخل تناسبهم للوصول للهدف المنشود
ثانيا : ضرورة اقامة ندوات فى المدارس و يجب ان يكون المتحدث شخصا متخصصا فى مجاله وليس احدى المدرسات
لتكون الندوة مجدية و تأتى ثمارها
ثالثا : أن ما يزيد الامر سوءا هو بعد الاباء و الامهات عن اولادهم فى تلك الفترة اعتقادا منهم ان دورهم انتهى ما دام الاولاد لديهم المقدرة على المذاكرة وحدهم و كأن حياة الابناء اصبحت مدرسة و دروس و مذاكرة و بس دون الالتفات الى المرحلة العمرية التى يمر بها الابناء
والاخطر ان يكون الاب او الام على عدم وعى بكيفية التعامل مع الابناء ولا احتوائهم ... فى أحدى الدورات التى اقامتها لنا المدرسة
و التى اعتبرها الأكثر فائدة الصراحة هى الدورة عن طبيعة المراحل العمرية التى يمر بها الانسان و ما لفت نظرى هو تكرار أن الاب والام عليهم اسماع بناتهم كلمات الاعجاب بها حتى تعتاد الفتاة على سماعها ولا تكون متعطشة و محرومة عاطفيا منها فتستجيب الى اى محاولة خارجية فى مرحلة عمرية غير مناسبة
رابعا : لا تكن كمن يدفن رأسه فى الرمل ... اذا اتت ابنتك و قالت انها تحب و هى مازلت صغيرة السن على ذلك لا تتعامل مع الموقف و كأنه عيب انك تتكلم لان دا هيخليها تاخد رأى اصحابها و هن بدورهن لا يعتبرون افضل منها فى هذا لانهم فى نفس الفئة العمرية و بالتالى فنصيحتهم على الارجح تزيد الطين بلل
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
على الهامش :
بما أن عيد الام خلاص اهو كمان يومين فأنا كنت مبسوطة الايام دى عشان بناتى فى المدرسة جابولى هدايا و فى منهم اللى بعتولى جوابات
صغنونة كدا على أدهم وانا فرحت بيها اوووووووووووى هبقى اصورهم و احطولكم الصور هنا بس مش عايزين قر ها مش ناقصين و النبى ॥ صحيح الامهات بتفرح لما ولادها يجبولها هدايا بس بجد انا فرحت كأنى مامتهم بالظبط

الجمعة، 12 مارس، 2010

لمحات


"القريب منك بعيد .. و البعيد عنك قريب"
هكذا الانسان فى معظم الاحوال ... يفكر دائما فيما هو بعيد عنه
فدائما نحب النجوم فيمنعنا النظر اليها من رؤية ما حولنا من أناس قربهم كالنجوم يضئ عالمنا
*****************************

"لا تجبر الانسان ولا تخيره ॥يكفيه مافيه من عقل بيحيره ॥اللى انهارده بيطلبه ويشتهيه ... هو اللي بكره هيشتهي يغيره "
صلاح جاهين
مممممممم هل سصل حب التغير عند بعضنا الى هذا الحد وهل يسرى ذلك على من نحب ؟؟؟؟
لا اعتقد ذلك فى الانسان يحب التغير اذا ما اصابه الملل فأذا احب التغير لمجرد التغير فانا اعتبر ذلك انانية منه
**************************************

"كلما ازدادت معرفتي بالناس ... كلما تلاشى إنبهاري بهم"
قرأت تلك الجملة و ابديت اعتراضى هل فقط ما يقربنى من الناس انبهارى بهم
اعتقد لا و اذا تلاشى انبهارى بهم فالعيب عندى وليس عندهم .. اعتقد ان الانبهاراحيانا يكون مرحلة اولى للتعارف و لكن علينا ان نتوقع ان من تعرفنا عليه فى النهاية انسان لا تدع انبهارك بما امامك أن ينسيك ان قربكم هو الاهم من تلاشى الانبهار
**********************
لؤلؤة و صدفة
منذ زمن وانا اشبه المرأة بالؤلؤة لهدوءها و جمالها
ولان المرأة الحق نادر وجودها
واشبه الرجل بالصدفة
لانه الامان و لانه دائما يحمى لؤلؤته من العيون
او هكذا يحاول فلا يراها غيره
***********************

" الموت فجأة "

اول امبارح كانت هدوسنى عربية اه و الله
كنت ماشية سرحانة بفكر لا الحق كانت حاسة ان روحى زعلانة
كنت ماشية بطيب خاطرها و اطبطب عليها فوقت انى ادام العربية وجها لوجه
لولا ان السواق كان مركز كان زمانى فى خبر كان
رغم اننى فى الحقيقة تمنيت ان اصاب
*********************
نفسك صديقة
عندما تكون وحيدا ... ابحث حولك
هناك دائما من ينتظر أن تراه
ربما لا يملك الشجاعة ليكون بجوارك
ابحث جيدا
اذا لم تجد
اصنع من نفسك صديقا و حبيبا و أخا وأما و أبا
*********************

مفترق طرق
حيرة الاختيار هى اصعب انواع الحيرة على نفوسنا
ربما لاننا لا نعرف اى الطرق نسلك
و تزداد حيرتك اذا ما كان عليك ان تختار بين قلبك و عقلك
لا احب الحياة فى حيرة ذلك الاختيار

الخميس، 11 مارس، 2010

حضن روح

انا بحب الصورة دى
عارفين ؟ انا بحس ان البنوتة الصغيرة دى مش بنتهم
انا شايفة ان البنوتة دى هى روح الحبيبة
يعنى هو نايم على رجلها و روحها فى حضنه
جايز يكون تفسير خيالى جدا للصورة و البنوتة فعلا بنتهم
بس انا حستها كدا اول ما شفتها يمكن عشان كتير كنت بشوف
لما اتنين يحبوا بعض اوى روح كل واحد فيهم بتبقى فى حضن التانى
حتى لو بعدوا عن بعض بتفضل ارواحهم كدا !!!!
الاهم انك تلاقى اللى يستاهل روحك بجد

الجمعة، 5 مارس، 2010

اليوووم المفتوووح


اليووووووووووووم المفتوح

لألألأ مش اليوم المفتوح بتاع المدونة

دا اليوم المفتوح اللى اتعمل فى المدرسة انهارده

انا بحب اليوم المفتوح رغم انه بيكون متعب جدا جدا

بس بيبقى حلو ... سامعة حد بيقول ليه ؟ هقولكم مش تستعجلوا

نبدأ من أول اليوم ممممممممم أول اقولكم نبدأ من اليوم اللى قبله

يوم الاربعاء ليه بقى ؟

لان اخر اليوم اتعملنا اجتماع للتحضير لليوم المفتوح و كل واحد يعرف دوره ايه؟

وأذ الصااااااااااااعقة استاذة مى مسؤلة التصوييييير ... دا استاذ ايمن اللى بيتكلم مسؤل النشاط

و الصراحة عمل مجهود جامد فى تحضير اليوم المفتوح واكيد فى ناس ساعدته فى وضع البرنامج الخاص باليوم

بس انا مش اعرفهم .... المهم

نرجع للصاعقة عايزة اقولكم انا سمعت الصاعقة من هنا و قلت ربنا يسترررررر

كلمة فى سركم انا لا افقه شيئا فى التصوير فيعنى لو حصلى حاجه الايام اللى جاية اعرفوا ان مستر ايمن قتلنى عشان بوظت الصور

الصاعقة التانية بقى ان استاذ ايمن قال ان استاذ راضى مش هيحضر معانا اليوم المفتوح :(:( زعلت انا اوى الصراحة

لان كمان ميس نجلاء مش هتبقى موجودة وانا بحترم الاتنين دول اوى اوى

نيجى بقى لليوم المفتووووووووووووح

نبدأ بالفقرة الاولى

كانت الاذاعة و الطابور

مسؤل الاذاعة كان مستر محمد سمير وكانت جامدة جدااااااااااا جاب كام سؤال الصراحة احرجنا جدا يعنى

لأ وايه مش يسبها مفتوحة اى حد يجاوب ابداااااااااا و دى تيجى مسك المايك وقال الاسئلة للمدرسين و المدرسات

احراج احراج يعنى مش اى كلام .... عدت الاذاعة على خير بدون احراج الحمد لله انه ماقلش بالاسم مين اللى يجاوب كانت هتبقى حوسة الصراحة

الفقرة الثانية

الافطار

الفقرة دى بقى بتبقى مع اولياء الامور و الاولاد و المدرسين

مين اللى كان بيصور فى الوقت دا بقى ايون ايون صوح

انا انا ... كنت بعدى على كل مجموعة بتفطر و اصورهم و اقولهم عشان امسكها عليكم ذلة انكم بتكلوا كتيييييييير

فى الوقت دا كان الفائقين من الروضة بيتكرموا ... ايون احنا بنكرم الفائقين من الروضة عندكم اعتراض

انا بقى فى الفقرة دى كنت عاملة زى الاغنية الشعبية الشهيرة حبة فوق حبة فوق وحبة تحت حبة تحت

عارفين الاغنية دى ؟؟

صورت فوق فقرة الافطار و نزلت تحت عشان تكريم فائقين الروضة بس كانوا عيال قطاقيط اوى الصراحة عجبونى

أذ وانا بصور الاقى مين داخل علينا فى القاعة مستر راضى تاتاتاتااااااااااااااااا اه و الله مستر راضى جه فرحت اوى عشان كمان لقيت ميس نجلاء جت حسيت ان اليوم كمل بجد

خلصت الفقرة على خير الحمد لله بدون خسائر فى الصور وربنا يستر و تعجبهم الصور اللى صورتها بقى

الفقرة الثالثة

حفل التكريم للفائقين فى الترم الاول ( ابتدائى و اعدادى )

انا مش حضرت الفقرةمن اولها لانى كنت بصور فى روضة زى ما قلت

بس اعتقد ان الفقرة بدأت بتقديم الفقرة من مستر محمد جمعة و مستر ابراهيم

وهوووووووووووووب النور قطع ... اى والله النور قطع

طبعا ماحدش عرف يتكلم عشان المايك بقى و كدا قلنا نأجل التكريم

و نعمل الفقرة الرابعة بدل التالتة مؤقتا لحد ما يجى النور

الفقرة الرابعة كانت اللعببببببببببببب

بس مش كان فى بالونااااااات ينفع كدا ؟؟؟ دا انا بستنى الفقرة دى عشان البالونات

ابقوا فكرونى اشتكى مستر ايمن عشان مش جاب بالونات

وطبعاااااااااااا كنت بصور الولاد و هما بيلعبوا و المدرسات معاهم و اولياء الامور كمان

لعبنا شد الحبل و المنديل و سباق جرى و حاجات تانية كتير

نزلنا تانى بقى عشان نكمل حفل التكريم بس برضو من غير نووووور

وبدأ مستر راضى مدير المدرسة ينادى على الاولاد و الاستاذة يسلموهم الجوائز

عجبنى اوى بقى ان مستر راضى لما جه عند بنات اعدادى قال الانسة : فلانة

ليه عجبنى ؟ عشان بجد البنات فى الفترة دى بيحبوا اوى تتعامل معاهم انهم بقوا انسات كبار مش لسه بنات صغيرين

فكانت لفتة جميلة الصراحة

لحد هنا و خلص اليوم بدأت الاولاد تروح و المدرسين و المدرسات طلعنا اجتماع مع مستر راضى و استاذ الشحات

عشان دورة تدريبية خاصة بنظام الجودة فى المدارس و أهميته وكان حوار ممتع لم يفسده الا تعبنا من اليوم

ممممممم ملاحظاتى على اليوم :

اكتر حاجه عجبتنى الصراحة ان اولياء الامور سواء الاب او الام كانوا حرصين جدا على مشاركة اولادهم فى لحظة التكريم

حتى روضة اه و الله حتى روضة كانوا اولياء الامور معاهم تصوروا !! ولاكأنهم اخدوا شهادة الليسانس


اليوم كان حلو لولا قطع النور دا عشان مش عرفنا نكمل فقرات حفلة التكريم

و الاسكتشات اللى كانوا محضرنها المدرسين خسارة الصراحة جدا


خلص اليوم على خير و ادعوا معايا بقى الصور تطلع حلوة