يوم ضحكت فيه من قلبى بعد غياب


أذ أنه دائما معروف عنى انى بروح المدرسة متأخر
كان صاعقة بالنسبة ليا انى اوصل المدرسة امبارح بدرى 3 دقائق بحالهم
اى والله يا جدعان ... الاستاذة فى شئون العاملين بتقولى ميييييييييييس مى لا مش ممكن ابداااااااا
اخيرا هتمضى فى الدفتر بدل ما تمضى فى التأخير ... احم احم عادى يا استاذة بقى خليها عليا هههههههههههه

المهم دخلت وانا كلى اطمئنان ان انهارده يوم لذيذ بما انه يوم مفتوح و كدا والحياة حلوة وهنخرج شوية من جو التدريس وبس يا واد و بس يا بت دا .... و الاقيلكم وانا فى واقفة فى حالى ميس نسمة بتزفلى نبأ لم يكن فى الحسبان ... أ/ راضى ( وانا قلت قبل كدا مين مستر راضى مش كل شوية هقول انا ) قال امبارح انك هتكونى مسؤلة التوثيق ... التصوير لكل فقرات اليوم يعنى ...

ها ... نعم انا مين ؟؟ دا انا طبعا بعد لحظة اذبهلال دا امتى قال الكلام دا وانا كنت فين نايمة مثلا ؟؟ .... اتريهم قالوا كدا قبلها بيوم وانا كنت خرجت برا المدرسة مع بناتى فى التبنى التربوى ... ممممممممممم وفكرت فى عقل بالى انى اعمل عبيطة واقول ماعرفش يا بيه وماحدش قالى بس تراجعت عن تفكيرى الشرير دا احسن البت نسمة تروح فطيس و لا حاجه بما انها تسلمت مسؤلية اخبارى بالتكليف ... وقلت خلاص بقى ذنبهم على جنبهم هما شكلهم محرموش من المرة اللى فاتت اللى صورت فيها

وأدور على الكاميرا بتاعت المدرسة فص ملح و داااااااااااااااب يا نهار ابيض اعمل ايه انا دلوقتى بقىىىىىى و هوووووب نطيت على ميس نجاة و أخدت موبايلها الجميل الصغونن دا وقلتلها هشحنه واصور بيه قالتلى ماشى وقد كااااان


وتبدأ أولى فقرات اليوم اللى هى كانت امتحااااااااان ... هو ماكنش امتحان امتحان يعنى هما كام سؤال على المواد كمهمة تشخيصية للولاد وكانت لذيذة يعنى وخلصت بسرررررعة فى كل الفصووووول ما عدااااااااااااا ...... فى اولى ابتدائى

ايه دا ... لا بجد صعب صعب انا طبعا اتدبست اقف على اولى ابتدائى فى الامتحان بما أن الادارة كلفت ميس نجاة فى الوقت دا بحاجه تانية وهى لسه مديانى موبايلها اقولها لأ بقى وابقى ندلة وانتوا عارفنى مش ندلة خالص خالص ... وطبعا طبعا بما انى مش ندلة قلت لازمن ادبس حد معايا فى الفصل ووقع الاختيار على ميس لبنى رفيقة الكفاح و وقفت معايا غصب واقتدار منى على اخلاق وذوق منها

وبدأنا المعركة مع ولاد وبنات اولى ابتدائى اننا بس نفهمهم ايه الاسئلة المكتوبة دى و عايزين منهم ايه ... و هما طبعا الكلمات بالنسبة ليهم لوغرتمات و علينا نفك الطلاسم ... ربنا يكون فى عون مدرسينهم بصراحة

بدأت بعد كدا فقرة الافطار و دخل اولياء الامور الفصول مع اولادهم و مع مدرسينهم عشان يفطروا سوا فى محاولة للتقريب بين الثلاث فئات وطبعا كان لازم ابدأ رحلتى فى التصوير فأخدت الموبايل و زوغت من لبنى وسيبتها فى الفصل لوحدها يا عينى

وبدأت رحلتى المكوكية وصورت البنات ( لانى مسؤلة عن تصوير البنات ) فى فصولهم اثناء وجبة الفطار ... وبعد كدا طلعنا على الروف وبدأت الفقرة الثالثة

فقرة اللعب

هييييييييييييييييه هييييييييييييييييييييه .... دا انا طبعا اوعوا تكونوا فاكرين الاطفال تؤ تؤ اطلاقا اصل انا كنت ناوية العب معاهم
اللعب كانت كتير بصراحة العيب الوحيد ان المايك ماكنش شغال فكان صعب السيطرة على البنات بأصواتنا كدا فقسمناهم مجموعات وكل مجموعة تلعب مع مدرسينها

وبدأت أصور لعب كل مجموعة ... مرة نط الحبل و مرة لعبة الدقيق ( لمن لا يعلمها بنجيب طبقين ونحط فيهم دقيق و عملة معدنية واتنين عليهم يطلعوا العملتين بدون استخدام ايديهم ) و مرة لعبة صيادين السمك و مرة لعبة معرفش اسمها اللى هى اتنين يدخلوا فى شوال وينطوا لحد ما يوصلوا خط النهاية اللى يعرف اسمها يبقى يقولى ينوبه ثواب واجر ... وطبعا صورت المدرسات صووووووور كتير فضلت أذلهم بيها طول اليوم

هل انا بقى قعدت اصور بسسسس سؤال وجيه

والاجابة لاْ طبعاااااااااااااا ... يعنى اتعب واجى و اطلع الروف وكمان ملعبش ابسلوتلى لا يونكن ابدا ..... لعبت شد الحبل مع ميس أميرة واتلغبت و مع ميس نجلاء مرتين و كانت النتيجة تعادل 1/1 انا طبعا كنت عايزة ازوغ من ميس نجلاء والنتيجة 1/0 عشان ابقى غلبتها الا انها أبت ذلك وأصرت تاخد بتااااارها منى وتغلبنى ... و لعبت مع بناتى حبايبى انى ادوخهم و كدا واذ اننى قعدت ادوخهم كتير كتير كتير وانا اصلا كنت مصدعة من الصبح دوخت انا فى الاخر وربنا ستر ومش اغمى عليا

و جه دور لعبة الصراحة ولنا هنا وقفة لييييييييييه ؟؟ ... هقولكم ... أذ ان ميس نجلاء قررت تلعب مع البنات لعبة الصراحة ( ميس نجلاء وكيلة المدرسة و زوجة استاذ راضى المدير) وجه الدور عليها عشان تتسأل وكأن البنات ما صدقوووووووووا ... لازمن ولابد تحكيلنا قصة زواجك من استاذ راضى ... آن آن آآآآآآآآآآآن ... وميس نجلاء اتكسفت جداااااااااا و مش عارفة ترد وانا طبعا بصطاد المواقف الحلوة اللى زيى دى عشان امارس الرخامة و قعدت اقولهم شجعوها عشان تقول و العيال مش صدقوا وبدأوا يغنوا قوووووولى قووووووولى قووووووولى وكأنهم بيشجعوا لعيبة نادى الزمالك عشان يجيبوا جون و ينصفوهم مرة من نفسهم .... وانا قاعدة بالموبايل مستنية لحظة الحكاية عشان اصور فيديو بقى ... اوعى حد يفهمنى صح انا كنت هنشر الفيديو على المدونة هنا بس والله
بس ميس نجلاء قدرت تهرب من الاجابة و ماقلتش حاااااااجه مسيرى هخليها تقر و تعترف بالقصة وانشرها برضو ههههههههه ... معرفش ليه قصتهم بتفكرنى بكلام د/ ستيتة عن جوايز السماء


كان فى نفس الوقت تحت فى الحوش التانى تدور مسابقات شعرية و قصص قصيرة و رسم بين التلاميذ الموهوبين

خلصت فقرة اللعب وكان حان وقت صلاة الظهر جمعنا البنات و صلينا فوق على الروف و الرجالة صلوا تحت فى الحوش وكان موقف مهيب بصراحة

بعد الصلاة نزلنا تحت واجتمعت المدرسة كلها فى الحوش لاستكمال فقرات اليوم من اسكتشات مضحكة و فقرات تسليم الجوايز و كلمة مدير المدرسة

وانتهى اليوم بأجتماعين ... اجتماع اصحاب المدارس مع اولياء الامور لالقاء رأيهم فى المدرسة من سلبيات و ايجابيات ثم اجتماع اصحاب المدارس مع مدرسين و مدرسات المدرسة لالقاء ايجابيات و سلبيات الادارة

وانتهى اليوم على خير الحمد لله .... واتبسطت جدا لليوم دا وضحكت اخيرااااااا بعد ايام كتير مضحكتش فيهم من قلبى و ربنا يسامح اللى كان السبب فى كدا

تعليقات

‏قال يوميات شحات
مشكورة
تقبلي مروري
‏قال Wise
بما انك زميله كفاح اقصد زميله لنفس المهنة
فانا مقدرة اوووووووى يعنى ايه يوم من غير حصص
يكفى جدا انه يوم ضحكتى فيه من قلبك
الحقى افرحى حبه كمان قبل ما ندخل لدومامة التصحيح والكنترول
‏قال جارة القمر
يوميات شحات

لك حزيل الشكر
‏قال جارة القمر
wise
اهلا اهلا بزميلة الكفاح العزيزة
هههههههههههه بتفكرينى ليه بس يا بنتى ال تصحيح و كنترول ال

ربنا يسعد قلبك
‏قال كلمات من نور
كل داه علشان تحرمي تيجي بدري ههههههههه لو كنتي اتأخرتي كان غيرك اتدبس يا ميويه
‏قال بدر
أزال المؤلف هذا التعليق.
‏قال غير معرف…
كلامك بيحسسنا اننا كنا معاكى
الاجمل انك كنتى مبسوطة
دا العجبنى بصراحة
‏قال بدر
كان يوم جميل ويارب ال جاى اجمل

وربنا يسامح ال كان السبب
‏قال شمس النهار
فكرتيني بالفن داي اللي كنا بنعمله في مدرسة بناتي

كنت في مجلس الاباء وبمااني مهندسة ديكور كنت بكون من منظمي اليوم
وكان بيبقا يوم جميل جداااا


ربنا يفرح قلبك دايما

وكل سنه وانتي طيبه ياجميلة
ومحققه كل احلامك
:))
‏قال جارة القمر
كلمات من نور

هههههههههههههه اه والله عندك حق
‏قال جارة القمر
غير معرف

ميرسى جدا
‏قال جارة القمر
بدر

اللهم أمين
‏قال جارة القمر
شمس النهار

اها فعلا بيبقى يوم حلو اوووى

ربنا يسعد ايامك يارب

المشاركات الشائعة من هذه المدونة

الرجالة دول جزم بس المشكلة ان الستات مابتعرفش تمشى حافية!!!!!!