بيت الحبايب + تحديث


اولا لكل من سأل عنى ... ألف شكر وجزاكم الله خيرا كثيرا

انا الحمد لله دلوقتى أحسن صحيا كتير من الأول

ثانيا : كان المفروض هاخد اجازة من التدوين لكن حصل حدث غير المجرى شويتين تلاتة

الحدث ايه هو بقى ؟؟؟ سؤال وجيه جدا

انطلاق مدونة بيت الحبايب بعد انتظارى انها تنطلق من فترة طويلة جدا و الحمد لله انطلقت اهو و ربنا ييسر و تستمر

اشمعنى المدونة دى هقولكم

دايما كنت فى عملى لا اتقرب لأحد ولا احاول التقرب لسببين

أولهم : ان ناس كتير فى الشغل لا تؤمن بالتنافس الشريف ... و ما دام انا بشتغل معاهم ابقى عدوة وليس العكس

ثانيهم : أنى عشان اتقرب من حد لازم اعرفه شخصيا مش ينفع اكون رأى عن شخصيته وانا مش بشوفه غير فى شغله بس


ظل رأيى كذلك حتى شاء السميع العليم أنى اشتغل فى المدرسة اللى انا فيها حاليا
ممممممممممم و اتغيرت حاجات كتير ... أذكر فيما أذكر أول مرة دخلت فيها المدرسة ودا كان ساعة ما روحت الدورة التدريبية لاختيار المدرسين الجدد ... وبما انى مش عارفة حاجه سألت ايه الدورة دى وانا هحضر الدورة و اضيع وقت وبعد كدا مش اشتغل هنا ايه التعب دا يعنى ؟؟؟ ... وكان الرد اتفضلى حضرتك اتكلمى مع المدير

آن آآآآآآآآآآن تتتتتتش .... دا فى عقل بالى طبعا مدير ايه بقى ما كنا كويسين ( لمن لا يعلم انا فى اى شغل مش بحب اتعامل مع الادارة خالص)
طب فين المدير .... هناك فى المكتب دا
دخلت وانا ركبتى بتخبط فى بعض ما انا مش متعودة بقى ... و لقيت ناس كتير قاعدين ... اااااه يعنى لو المدير هزقنى ولا حاجه هتبقى فضيحة بجلاجل تمام تمام يعنى

نفضت عن ذهنى كل الحاجات دى ودخلت بشجاعة صغيرة و اتكلمت مع أ/ راضى


انا : حضرتك مش هقدر الدورة كلها عشان انا اصلا بشتغل فى مدرسة مش هقدر اخد اجازة و اجى احضر هنا وانا مش عارفة هشتغل ولا لأ

أ/ راضى : احضرى بس انهارده وربنا يسهل بعد كدا يا ستى

ايه دا ... دا انا اتكلمت و الدنيا عدت عادى الحمد لله و مش شخط ولا زعق كعادة المديرين ... طبعا انا ساعتها ماكنتش فاهمة كلامه انا هحضر ليييييه ما انا كدا كدا مش هقدر احضر بعد كدا ... وفهمت بعدين أن على كل واحد يعمل اللى عليه واذا الطرق اتسددت هتدخل عناية ربنا و تحل الموضوع من اوله لاخره فى غمضة عين وهذا ما حدث بالفعل


واشتغلت هناك جو صحى للعمل بغض النظر عن ضغوط العمل لكن التعامل نفسه الى حد كبير جدا صحى ... مافيش ضغائن ولا حركات من تحت التربيزة ولا كان عليا اقعد افكر فى تصرفات الناس مليون مرة عشان اعرف هما يقصدوا ايه بالظبط ؟؟؟

أ/ راضى هو صاحب المدونة الجديدة
اعتقد هتكون مكان لفكر يحترم ... فكر نفتقده


تعليقات

‏قال شمس النهار
حمد الله علي السلامة

نادرا ماتلاقي مكان كويس كده

عارفه لما بيكون مدير المكان كويس ومحترم
المكان بيتظبط

وهروح اشوف مدونة بيت الحبايب

:))
‏قال غير معرف…
شفاكي الله وعفاكي من كل مكروه
بس ايه علاقة تقديمك للدورة بالمدونة
عجبني اوي طريقة كلامك وصفك قرأتها مرتين بس حبفي ادخل المدونة بسبب طريقتك دي
اهاه نسيت الأول هيه هيه هيه
‏قال غير معرف…
اعتذار معلش اسف شمس النهار يظهر وانا بكتب الكومنت انتي كتبتي فحبقي الثاني :) وانتي الأول تقبلوا اعتذار
‏قال كلمات من نور
الحمدلله على سلامتك يا جارة القمر الحبيبة

وربي دايما ويقفلك ولاد الحلال حواليكي

والي المدونة لنرى
‏قال جارة القمر
شمس النهار

الله يسلمك يارب من كل شر


ايون عندك حق مافيش مكان كويس كدا الا قليل جدا
‏قال جارة القمر
غير معرف

اها انا نسيت انوه عن ان استاذ راضى هو صاحب المدونة معلش غلطة مطبعية و تداركنا الخطأ يا فندم

ان شاء الله تعجبك
‏قال جارة القمر
كلمات من نور

ربنا يكرمك و يسلمك من كل سوء

ربنا يسمع منك :)
‏قال غير معرف…
يافندم حتي هنا :) ده انا مش بحب اسمعها من موظفيني في الشغل حسمعها هنا كمان علي العموم كلك زوق بس ال لاحظته انك انسانة طيبة قرأت معظم بوستاتك بلاقي فيها خفة دم وطيبة واحترام لكل اصحابك ربنا يارب يسعدك ويهنيكي بحياتك
‏قال جارة القمر
غير معرف

ههههههههههههه خلاص نعتبرها غلطة مطبعية دى كمان

ميرسى جدا على ذوقك و اهلا بيك دايما فى المدونة

المشاركات الشائعة من هذه المدونة

مقتطفات اعجبتنى २ - شهرزاد الخليج

الرجالة دول جزم بس المشكلة ان الستات مابتعرفش تمشى حافية!!!!!!