"فالابوة قرار ... وأنت لا قرار لك "


كنت بتكلم مع مدرسة زميلتى بتاعت علوم وكنا بنحكى عن المواقف اللى بتضحكنا من الولاد فحكتلى عن موقف موتنى من الضحك
قالتلى انها كانت بتصحح ورق الامتحان للصف الخامس الابتدائى و هى بتصحح ورقة كتب عليها اسم عبد الرحمن أشرف ولاننا عارفين الولد دا استغربت جداااااااااا لان الخط اللى فى الورقة وحش جدا وكمان مش مجاوب صح كعادة عبد الرحمن أشرف .... ميس لبنى ماخدتش فى بالها وصححت الورقة وخلاص وبعد كام ورقة كمان صححتهم لقيت ورقة تانية مكتوب عليها عبد الرحمن أشرف ... الله وبعديييييين بقى يعنى التانية ورقة مين بقى ولا ورقة كان عامل فيها مسودة وجت غلط وسط الورق ولا ايييييييييه ... بس الورقة دى خطه حلو ومجاوب صح كمان دا مستواه فعلا اومال التانية ورقة ميييييين

وهوب راحت واخده الورقتين وراحت للمشرف وقعدوا يفكروا لحد ما توصلت ميس لبنى ان الورقة أم خط وحش اكيييييد بتاعت عبد الرحمن رأفت ... ولمن لا يعلم عبد الرحمن رأفت دا حضراتكم ولد والولاد قليل عملة نادرة فعلا فعلا تحس انه تايه ضايع حاجه زى كدا يعنى المهم انه فى النهاية تحس ان مخه مش معاه واداه للى جنبه او نساه فى البيت .... طب ازاى يا ميس ؟؟؟ دا المشرف مستعجبا
قالتله والله زى ما بقولك عبد الرحمن رأفت خطه وحش و مستواه أوحش يبقى اكيد هو ... من هنا لهنا جابوا الولد

دا خطك

اه يا مستر دا خطى

يعنى الورقة دى بتاعتك ؟

اه يا مستر دى ورقتىىىىىىىى

أنت اسمك ايه يا بنى انت ؟

عبد الرحمن رأفت

اومال ليه كاتب عبد الرحمن أشرف

مش عارف يا مستر بقى انا فاكر انى كتبت عبد الرحمن رأفت


الصراحة لما سمعت اللى حصل ماكنش ادامى غير انى اقولها انتى اللى غلطانة ازاى مش ترجعيله على اسمه قبل الامتحان زى ما ترجعيلهم على المادة كدا ... ها ؟؟ غلطانة انتى ولا مش غلطانة اعترفى بغلطتك الانكار مش هيفيدك

الموقف مضحك ... بس انا لما قعدت بعده وفكرت فى اللى حصل ... ايه يخلى طفل فى خامسة ابتدائى مخه مش معاه ايه الهم اللى عنده يخليه كدا يعنى لو كان كبير مثلا كنت عذرته هقول عنده هموم او مشاكل او بيدور على شغل او او او او ... لكن دا طفل الولد دا مش لوحده فى اطفال تانية كدا برضو تحس ان مخهم مش معاهم

يا ترى البيت السبب ؟؟؟ ما هو أكيد مش مستقر نفسيا عشان يقدر يكون مستقر عقليا ... لما اتقربت شوية من أخت الولد دا وركزت شوية فى تصرفتها ... قلت أكيد المشكلة فعلا فى البيت ... البنت دى كثيرة المشاكل مع زميلاتها مش لانها غاوية مشاكل ولا حاجه هى بس عايزة تلفت الانتباه لها ... تلفت الانظار ... ودا معناه أن لا هى ولا أخوها حاسين بقيمتهم فى البيت ولا حاسين أنهم لهم وجود يحترم ورأى يأخذ به
_ دى مجرد افتراضات شخصية منى _ و ممكن يكون وضع البيت نفسه مش مستقر يعنى مشاكل وخلافات وكعادة المصريين الخناقات جزء لا يتجزأ منها الاطفال ... الاقى الام او الاب بيتخانقوا وولادهم قاعدين عادى جدا بدون مراعاة ان دا هيأثر عليهم نفسيا وعصبيا وعقليا

هو أنا أنفع أم ؟؟ _ السؤال نط فى دماغى فجأة _ بشخصيتى و أفكارى و طريقتى فى التعامل هل يجوز انى ابقى أم ناجحة بكل دا ؟؟؟
ولا هبقى أم نص كم زى الامهات اللى مش واخده بالها من ولادها دى ... يا ترى لما اتجوز ان شاء الله يعنى هاخد بالى انى لما اتخانف مع جوزى _ ايون ما هو لازم هتخانق معاه اومال احس ازاى بطعم الجواز حاجه غريبة والله _ مايكونش الاولاد موجودين وسامعين لما يدور بيينا ؟؟ ولا ساعتها هنسى كل الكلام اللى على الورق دا وهبقى زى اى مصرى أصيل ساعة العصبية بيلوش فى اى حد و خلاص ؟؟

مش عارفة اجاوب على الاسئلة دى و مش منتظرة اجابه ... بس توصلت انى هدرب نفسى انى لازم ابقى أم بمعنى الكلمة ... أم يجوز أن تكون أما

اتارى وظيفة الأم دى صعبة يا جدعان وانا مش واخدة بالى ... افتكرت كلمة للغيطانى احب انى انهى بيها البوست فكروا فيها انتوا كمان

"الابوة قرار ... وأنت لا قرار لك "




تعليقات

‏قال adel
مين قال حكاية لازم تتخنقي عشان تحسي بطعم الجواز !!!
هي اه مفيش حياة علي طول حلوة وفيها مشاكل بس جملة بتدي طعم للجواز ده غلط
زي اللي يقولك بالظبط كترا لعيال عزوة والكلام الحمصي ده

اعتقد فعلا الولد والبنت عندهم مشاكل نفسية ومحتاجين اهتمام
‏قال جارة القمر
عادل

بهرج يا بنى انا اصلا شخصية ضد الازعاج و الخناق هتخانق ازاى بقى

متفقة معاك اكيد عندهم مشاكل نفسية
‏قال شمس النهار
طبعا الولد والبنت عندهم مشكله ومشكله كبيره مش بس ان الوالدين بيتخنقوا واضح ان في تبعيات لده عليهم

ياريت الاخصائيه تحاول تساعدهم

بالنسبه لموضوع الامومه ده فطري
ودراسه وفكر وخصوصا في زمنا هذا

الامومه ضمير اكتر من اي شئ
الام دايما تحكم ضميرها
وتحسن الحفاظ علي الامانه
واوتوماتك انتي هترب عيالك زي مااتربيتي وهتحسني كمان
لو قريتي كتير عن الامومه

ان شاء الله تكوني ام ناجحه
‏قال شمس النهار
البوست السابق كلماتك الشعريه عجبتني وهلطشها كده زي ماهي هحطها عندي في بوست

:)))
‏قال جارة القمر
شمس النهار

متفقة معاكى أن عندهم مشكلة فعلا ... يارب ربنا يسمع منك وابقى أم ناجحة ان شاء الله

من غير استئذان البوست والمدونة وصاحبتها تحت أمرك اكيد
‏قال كلمات من نور
ضحكت قوي من اللي عمله عبد الرحمن بس على فكرة مش شرط الموضوع يكون مشاكل أسرية وياريت تفضلي وراهم لغاية ما تعرفي ...أنا البيت الحمدلله مستقر بس عندي نوعين من الأولاد : ولدين قربوا ينسوا نفسهم في المدرسة دايما ينسوا دايما حاجاتهم في المدرسة والاتوبيس تخيلي ممكن يروح البيت ناسي شنطة المدرسة؟؟؟؟؟؟؟؟؟؟؟؟؟؟

وعندي اتنين ملوك عكسهم واعيين وفاهمين

دي بتكون كروموسومات يا بنوتي .....ومش حاقولك الاتنين الناسيين نفسهم كروموزومات مين ....ههههههه

بوست جميل وفعلا احيانا الأهل بيظلموا اولادهم ويارب تكوني أم جميلة زي ما كلامك جميل كده ويوعدك الزوج الصالح اللي يتعامل معاكي ومع اولادكم بما يرضي الله
"الابوة قرار ... وأنت لا قرار لك

بس
خلاص
انتى جبتى النهايه
ربنا يكون فى رأفت او اشرف ابو الولد علشان نسى اسمه
‏قال عمرو وجيه
3ady fe atfal fe 3ano men el beet


bas besra7a sho3'let el tadres de sa3ba rabena ma3ako
‏قال جارة القمر
كلمات من نور

كروموسومات مين ها ها مين مين ههههههههههههههههه

انا معاكى طبعا احيانا مش بتبقى مشاكل بس حضرتك بتقولى ينسوا حاجات بتاعتهم لكن لا اعتقد توصل انهم ينسوا اسمهم صعبة اوى !!!

ربنا يسمع منك ... محتاجه دعواتك بجد
‏قال جارة القمر
محمود

اها متفقة معاك الجملة دى جابت من الاخر
‏قال جارة القمر
عمرو وجيه

اكيد فى اطفال كتير بيعانوا

ربنا يكرمك يارب :) ويعينك على شغلك انت كمان
‏قال قلم رصاص
السبب عصر السرعه صدقيني
الكارتون والجيمز والذي منه
وماينتج عنهم من انبهار وانشغال وبالتالي تشتت للعقل الخ الخ الخ

دا احنا ياكبار مش مركزين مش بسبب الاعباء والمسئوليات لالالالالا بسبب الحياه التيك اواي دي

دا طبعا لاينفي انه ممكن يكون فيه جوانب اجتماعيه للموضوع خاصة وان البييت هو اهم وحده بتأثر في تكوين الأطفال

شكرا على البوستات الاجتماعيه الهايله دي

^^

تقبلي تحيتي
‏قال جارة القمر
قلم رصاص

ممممممممم تصدق ممكن ... كلامك صح فعلا

ميرسى على ذوقك جدا :)
سلامو عليكو..

ممكن اهمال من البيت
وممكن مشاكل فى البيت
وممكن قدرات الطفل كده

فى حاجة مهمة لازم نعترف بيها وهى ان لكل طفل فروق فردية عن اقرانة فهو يتميز باشياء ويفقد اشياء اخرى

لك تحياتى
‏قال جارة القمر
ست الحسن جنى

اكيد كلامك مظبوط طبعا فى حكاية الفروق الفردية دى

منورانى دايما :)
‏قال شمس النهار
خير يارب في ايه

قلقتيني عليكي

هدعيلك من قلبي ربنا يريح قلبك
‏قال جارة القمر
شمس النهار

ربنا استجاب لدعائك ... جزاكى الله خيرا

المشاركات الشائعة من هذه المدونة

الرجالة دول جزم بس المشكلة ان الستات مابتعرفش تمشى حافية!!!!!!