فَصَبراً جميلاً


"فَصَبراً جميلاً واللهُ المُسْتعانُ على ما تَصِفُوْنَ"
انابحب الآية دى اوى
ولانى حاليا محتاجه ربنا اوى
لقيتها على بالى
غريب الانسان ليه بنفتكر ربنا بعد ما نقع
ليه مش بنفتكره من قبلها
يمكن عشان نرجعله تانى ؟
مش عارفة
او عشان اغبية ؟
يمكن برضو
لكن احنا حياتنا اختيارتنا
واخطائنا كمان اختيارنا
ولانى اتعودت من زمان انى اتحمل نتيجة اختيارى مهما كانت
ولانى دايما متعودة اخد ضربات فوق دماغى واقف على رجلى وعادى جدا
الا دلوقتى
ولانى دايما بقول ان كل حاجه قدر ربنا كتبها علينا
الا دلوقتى
لا مش كل حاجه نتهم فيها القدر
اصل كل حاجه بتبقى واضحة واحنا برضو بنصر نغلط
يبقى اختيارنا هو اللى وقعنا مش القدر ولا حاجه
المشكلة انك بعد ما بتغلط ما بترجعش تانى زى ما كنت
بتبقى فقدت حاجه جواك غالية عليك اوى
مش ممكن ترجع
نفسك
اصلك
كرامتك
احترامك
الاصعب انك تكون اتنازلت عنهم بكامل ارادتك
فتكون مجبر تتحمل نتيجة اختيارك
ومش من حقك تنطق حتى ولا تقول آآآآآآآآه
مش من حقك تضرب راسك فى الحيط
ولا تعيط و تصرخ
ولا تقول مين السبب
ولا تطلب حقك
ولا تاخد بعضك وتروح تضرب اللى اداك على دماغك بوكسين وتاخد حقك بدراعك
لانه ببساطة
انت اللى عملت فى نفسك كدا

تعليقات

‏قال star
يمكن بنفتكر ربنابعد ما نقع لأننا عرافين من جوانا أن هو القوى و هو اللى هيقوينا من تانى هو السند هو قوتنا فى ضعفنا...مش مهم بنفتكره أمتى المهم انننا بنفتكره فى ناس لا فاكرينه فى ضعف ولا فاكرينه فى قوه لذلك قولى الحمد لله أنك أفتكرتيه ولو حتى فى ضعفك...
أعتقد ان الضربه اللى بتوجع بجد اللى بتخلى الواحد ينكسر بجد اللى بتخلينا منعرفش نقوم ونكمل زى ماكنا بنعمل هى ضربة القلب و كسر المشاعر بس كل حاجه صدقينى بتداوى مع الوقت والشىء اللى كسرك يمكن يوجعك دلوقت لكن بمرور الوقت هتلاقيه مجرد زكرى تنزل الدموع من غير وجع وبس.
و أوقات لازم نختار الغلط علشان نقدر قيمة الصح لانك أنسانه مش هتعرفى تعملى الصح طول عمرك لازم يكون ليكى زله ده حق أنسانستك عليكى.
سورى إن كنت طولت فى الحديث بس مش هقولك أن نص البشريه مرت باللى أنت بتقوليه لكن هقولك خدى وقتك فى وجعك علشان لما تشفى منه ميسبش فيكى أثر.
ملحوظه
قصيدة سيد أحزانى حقيقى روعه عجبت كل أصحابى فقلت أوصلك صوتهم و مدى أعجابهم بيها..
‏قال اعقل مجنونه
ان الله مع الصابرين
ربنا ان شاء الله هيكون معاكى ياقمر
‏قال Admin
ربنا معانا كلنا
‏قال adel
مين قال حتي لو اختياراك متتمرديش عليه ؟
اعترفي بغلطك و صلحيه
لان الاستمرار في الغلط
اسوء من الغلط نفسه
‏قال الحب الجميل
عندك حق فى كل اللى قولتيه و الله يا جارة
مين السبب ....؟
وهنوقع الغلط على غيرنا ليه ؟؟؟
ماهو دا كان اختيارنا ....
الصبر جميل
بوست جميل بجد
دمتى بخير
‏قال جارة القمر
ستار

ميرسى اولا لاصحابك بلغيهم شكرى وخالص احترامى لذوقهم:)

ثانيا : طولى براحتك انا مش اعرفك بس حاسة انى بحب كلامك مش عارفة ليه

بالنسبة لكلامك انتى اكيد صح المهم اننا بنفتكره واكيد برضو كل حاجه بتداوى لكن للاسف مش هترجعى زى ما كنتى
‏قال جارة القمر
اعقل مجنونة

يارب يا جميل
‏قال جارة القمر
ادمن

يارب ونعم بالله
‏قال جارة القمر
عادل

لا تعليق على كلامك
‏قال جارة القمر
الحب الجميل

بذمتك مش صح والنبى انا قلت كدا برضو
بس خلينا نقول ان اختيارنا بيكون على اساس مقدمات موجودة ادامك ماهو مش ممكن هتختارى من غير مقدمات
اقولك يبقى العيب فى المقدمات :)

تسلمى يارب من كل شر
‏قال Ramy
جارة القمر

الغائبة (:

ازيك و كل سنة و انت طيبة و بخير

كلامك صح على فكرة بس لازم نتعلم من تجاربنا ان احنا منقعش فيها تانى دة صحيح ان كل تجربة بخرج كمنها بشىء بس لازم حتى لو التجربة دى سيئة لازم الشيىء اللى هخرج بيه من التجربة يكون ايجابى حتى لو كان شيىء بسيط

أنا اخطىء انا لا الوم احدا غير نفسى لأنى مدرك

رمضاااان كرييييم
‏قال جارة القمر
رامى

مش غايبة ولا حاجه معلش رمضان كريم بقى

كلامك صح ... لكن مش فى كل الاحوال نحطئ وحدنا لكل خطأ شريك فى الخطأ
‏قال بدر
لكل خطأ شريك فى الخطأ

المشاركات الشائعة من هذه المدونة

مقتطفات اعجبتنى २ - شهرزاد الخليج

الرجالة دول جزم بس المشكلة ان الستات مابتعرفش تمشى حافية!!!!!!