الرجالة دول جزم بس المشكلة ان الستات مابتعرفش تمشى حافية!!!!!!


سؤال بس فى الاول ... ايه شعورك اول ما شفت العنوان .... واول حاجه قلتها فى عقل بالك لما قريت العنوان

عنوان مستفز صح ؟؟؟ انا نفسى استفزنى الصراحة

تصوروا بقى ان دا عنوان جروب على الفيس بوك .... يا نهاااااااااااااااار مش فايت

دا ليه كدا يا بنات ؟؟ .... ما الرجالة بنى آدمين برضو يعنى عيب تشتموا فيهم عينى عينك كدا

هو اى نعم دلوقتى بقى الواحد نفسه يشوف راجل بجد .... مش من النوع اللى هو راجل عشان مكتوب كدا فى البطاقة

وبرضو نفسى اشوف بنات بجد .... مش من النوع اللى بقوا بنات عشان مكتوب فى البطاقة كدا

انا حاسة ان اللى عملت الجروب دا واحدة اخدت مقلب جامد حبتين من حبيبها فقالت اسد نفس البنات كلهم عن الرجالة مثلا

نتكلم جد بقى شوية .... انا الصراحة صدمت من الجروب دا مش عشان اسمه لالالالا

الجروب دا عملته بنات اكيييييد والطبيعى ان فى ولاد دخلوا عليه ... ولكم ان تتخيلوا كمية الشتايم بين الطرفين

ومش شتايم عادية تؤ تؤ تؤ .... بالاب والام و اديلوا

وعشان الليلة تكمل... يروح مجموعة شباب عاملين جروب ضد الجروب دا اسمه اييييييييه بقى ؟؟؟

البنات شباب زنوبة بس المشكلة ان الرجالة عايزة اسيبدروهات !!!!!!

ألا هو يعنى ايه اسيبدروهات ؟؟؟ اللى يعرف يقولى والنبى احسن حد يسألنى بعد كدا ولا حاجه مايرضكوش ابقى جهلة برضو

يانهااااااااااااااااااااار ابيض على التفاهة يا جدعااااااااااان

يعنى شباب مصر عملوا كل اللى وراهم و كله مية مية فبقوا فاضين انهم يقعدوا يشتموا فى بعض

اللى غاظنى اكتر واكتر بقى ... ان فى ولاد داخلين واخدين الموضوع ايزى جداااااااااااا ولا كأنك الاسم شتيمة فيهم ولا اهانة

وبيقولوا عادى دا هزااااااااار .... هزار ايه بس اللى يوصل لكدا .... ولا انا اللى حنبلية ومابقتش افهم الهزار عامل ازاى ؟؟؟

طب البنااااااااااااات بتشتم بالطريقة دى ازاى ؟؟؟ .... يعنى وهى قاعدة بتشتم بتبقى عادى كدا ولا بتحط حاجه على وشها عشان بتتكسف

والنعمة الولاد صعبوا عليا كل واحد من دول يدخل ياخدله دش تمام من البنات فيخرج و هو مش عارف يعمل ايه

طب اللى عملوا الجروب دا مش عارفين ان باباهم راجل !! و اخواتهم الصبيان رجالة !!!!!

المفروض ان الفيس بوك اتعمل كوسيلة للتواصل بين الناس بطريقة اسهل واسرع ... ولله الحمد احنا قدرنا نخليه مكان لتصفية حسابات الرجالة والستات من بعض ... كل واحدة مخنوقة من واحد تدخل تقول كلمتين حلوين والعكس صحيح ... كل واحد طلعان عينه من واحدة يطلع يطلع عينها هناك ... وتبقى هيصة ماهو ماحدش عارف حد ولا حد شايف حد

وبقى الادب على النت لا وجود له طالما انت مش شايفنى ولا انا شايفاك .... يعنى لو البنات اللى فى الجروب دا فى الحقيقة هتشتم ربع الشتايم دى وفى ولد فى القعدة .... والله ولا كانت فتحت بوقها وكل واحدة كانت هترسم انها الرقيقة اللى مافيش زيها ... وبابى و مامى وتعيش الحياة ولو قلها كلمه تعمل ان اغمى عليها من الكسفة

عشان ماحدش يفهم كلامى غلط ... انا عارفة ان فى بنات محترمات فعلا و ذوات اخلاق ... لكن انا بتكلم للاسف على الغالبية الموجودة حاليا

تعليقات

http://www.facebook.com/group.php?gid=105964059436951&ref=ts

ده بقه عنوان جروب علاقه المرأه بالشبشب
ده شىء عادى الايام دى
ومفيش
مشاكل
هتعقديها ليه بقه؟
غياب ثقافه علم اخلاق متعرفيش
بس االناس اللى فاضيه تعمل اكثر من كده
بس برضوة لسه فيه خير

ملحوظه
الجروب اللى فوق انا اللى عامله................!
والله استغربت من العنوان
ومش حبيته
وكنت لسه عاوز ارد بالغليظ
بس يالله الحمد لله اما بخصوص
ألا هو يعنى ايه اسيبدروهات
فوالله ماعرفت استغربت منه كتير
وانتي فرحانة بقي بالاسم وحطاهولنا عنوان للبوست!!! مهو فيه مثل بيقول.. ماشتمك الا ال بلغك.... هههههههههههههه.... ماشي ماشي...

الفيس بوك مليان بلاوي... هيا جت علي دي بس...
إزيك يا ميدوتي
أنا كنت ها أنط أجيبك من المدونة من جوا على الإسم
قلت يا جودعان انا عارفة دي البه ميمي مهذبة مين عمل لها عملية تحول أخلاقي نفوخي
هههههههههههههههههههههههههههههه

بالنسبة للإسبدريه فهو الجزمة المعفنة اللي بخمناشر تمناشر جنية
وبتبقى من القماش
وتلاقي رجالة بيلبسوها كده في الحر وهم رايحين يصلوا أو يشتروا الخضار للمدام من عند أم دعبس

عارفة في مسرحية المتزوجين لما مرات جورج سيدهم قالت بخرتك يا سبرين جوزي من عين الحسود؟:) أهو هو ده الإسبدريه

بالنسبة لجروبات الهيافة كفاية ان فيه جروب مصري ضد الفلاحين وقرفهم!!

الفلاحين
بلادك أصلا كلها فلاحين حتى اللي اتمدنوا ومعاهم مليارات اصولهم فلاحين

فكك الهيافة ليها ناسها
تحياتي يا قمرة
‏قال صمت المشاعر
يانهار الواااااااان

يعني هي الدنيا فضت خاااالص وبقينا كل اللي شاطرين فيه نشتم في بعض

ربنا يهدي ويستر علي شبابك وولادك يا بلد

دمتي بالف خير يا قمر
‏قال كلمات من نور
استغفر الله العظيم من التفاهه والحال اللي وصلنا له ...طيب اسمعي بقى الجروب الجديد اللي عملوه بعض أهل الإسكندرية : يا نلغي الصيف يا نشيل البحر ومش عايزين فلاحيين عندنا ييجوا ويرموا زبالاتهم في شوراعنا وبوم طاخ الجروب مولع لدرجة اتكتب عنه في الصحف الرسمية ....معقول كده؟؟؟؟؟؟؟؟؟؟؟؟؟؟؟؟
‏قال Ramy
جارة القمر

ازيك

دى بقت اخلاق الغالبية العظمى من الناس

احنا وصلنا لأنحطاط اخلاقى غير طبيعى

مش قادر أدرك مداه بجد صدقينى ربنا يحفظنا من الأشكال الضالة دى

علشان كدة حبيت المدونات لان شوفت ان كلكم محترمين اقدر اتكلم معاكم ونتفاهم ونتناقش و منتفقش بس بنحترم بعض فى الأخر

السبدرين صدقينى مش عارف بس سمعتة مرة واحدة فى مسرحية المتزوجون لما كانت مرات جورج سيدهم بترقيه و تقوله رقيتك يا سبدرين جوزى (:(:(:

بس بجد مش عارف (:(:بس لو عرفت هقولك

بوست مهم فى وقت لازم الناس تحترم بعض بقى

تسلم الايادى
اترجو الاطلاع على المدونه ومشاركتنا فى فكره تخص كل المدونيين
تحياتى
‏قال رحلة البحث
صراحه انتى جيتى ع الجرح اصل باحس اننا بنستخدم التكنولوجيا دى غلط
وربنا هيحاسبنا على الوقت والفلوس اللى بنضيعهم فى الهيافات
طبعا تعرفى "بس يا سيدى وراحت معيطه" تعرفى انها فى خلال كام يوم تقريبا 3 او 5 كان فيها حاجه واربعين الف عضو
وانكتب عنها فى الجرايد المحليه وجرايد عربيه كمان
اكيد دا له تفسير
بوست قيم بس العنوان صادم على فكره هههههههه
‏قال جارة القمر
محمود

بس انت اسمك هناك عمر ... هو انت محمود ولا عمر ولا واحد تانى خالص ؟؟؟

انا معاك ان الفاضى يعمل اكتر من كدا
بس الفضا ممكن نشغله بوسيلة تخليه مليان مش يفضل برضو فاضى رغم انشغاله
‏قال جارة القمر
بلال

وانا مالى بس هو اسم الجروب كدا مش مقصود اهانة والله

ميرسى لمرورك
‏قال جارة القمر
ابو على

آن آن آآآآآآآآآآن تششششششش ... انا كان قصدى خير ههههههههههههه انكم تعرفوا الخطر جايلكم منين ههههههههههه
‏قال جارة القمر
د/ستيته

اهلا اهلا اهلا ازيك يا دكتورة عاملة ايه وحشانى والله اوى

ههههههههههههههههههه لالالا مش تخافى عليا ماحدش يقدر يعملى عملية تحول نفوخى

الفلاحين !!! والله بتتكلمى جد ؟؟

دا احنا ياما لسه هنشوف على كدا بقى
‏قال جارة القمر
صمت المشاعر

اه والله نهار الوان فعلا
اكيد عملنا كل حاجه مش شايفة مافيش بطالة ولا ناس ميتة من الجوع وكلنا متعلمين

ربنا يستر
‏قال جارة القمر
كلمات من نور

والله الهيافة دى هتقلب علينا فى الاخر وهنشوف ايام سودا
‏قال جارة القمر
رامى

انحطاط اخلاقى ولا ثقافى ولا احنا الانحطاط بقى فى كل حاجه واحنا مش واخدين بالنا !!!

ولا يهمك دكتورة ستيتة قامت بالواجب وقالتلى الاسبدرين ايه هو
‏قال جارة القمر
رحلة بحث

سورى والله مش مقصود يبقى العنوان صادم بس انا عملتها قصد الصراحة عشان اشوف رد الفعل ههههههههههههه

ايون اسمع فعلا عن الجروب دا وفى غيره كتير للاسف ... انا فعلا معاك اننا بنستخدم النت فى اوقات كتير غلط
‏قال نـــوارة
العنوان عصبني وكنت داخلة اقولك مش معنى انك انجرحتي ولا قابلتي راجل وحش تقولي كلام زي دا

انا بجد مستغربة من تفاهة تفكيرهم واخلاقهم العالية بس نستغرب ليه

ما احنا في ايام ما يعلم فيها الا ربنا

عارفة موتي اسمع بنت بتشتم شتايم وحشة مجرد شتايم مابالك لما تكون شتايم قليلة ادب

ربنا يهدي شباب وبنات المسلمين

دمتي بحفظ الرحمن
‏قال جارة القمر
نوارة

هههههههههههههه انا شكلى كنت هضرب كتير فى البوست دا

معاكى حق انا كمان مش بطيق بنت تشتم شتايم بالشكل دا
السلام عليكم
الجروب ده
الفقير صاحب فكرته وعمله صديقى عمر
وانا من امسؤلين عنه
انا على فى الفيس بوك
متأسف حضرتك غير مرغمه
لمعرفه التفاصيل
سامحينى
لكثره كلامى
شكرا لكى
على
المووضوع

المشاركات الشائعة من هذه المدونة