شارع المعز

فضلت قاعدة ادام الشاشة كتير وفاتحة صفحة رسالة جديدة على المدونة
واكتب كلام و امسحه و اكتب وامسح ... كنت عايزة افضى اللى جوايا
وبعدين قلت ايه ذنب الناس بس ؟؟ هما متنكدين لوحدهم مش ناقصة نكد زيادة عليهم
فتحت المصحف وقرأت سورة مريم وهديت شوية
افتكرت ان الدراسة الميدانية لشارع المعز جبت الصور بتاعتها اخيرااااااااااااا بعد طول انتظار
الصور دى كانت منحوسة ولا ايه كل ما اجبها على فلاشة تبوظ ... بس ماحدش يجى يقولى
الجهاز باظ لما فتحت الصورويطالبنى بجهاز هدية اه انا قلت اهو الصور شغالة على الفلاشات تبوظها ماشى لكن مش الاجهزة هههههههههههههههههه
هحكى عن الدراسة دى واحطلكم صور ليها ... هحكى لانى كنت اتمنى افرج الصور دى لحد عزيز عليا اووووووى
لكن ربنا مش اراد و مبقاش ينفع خلاص كنت اتمنى يبقى هنا ... المهم نبدأ على بركة الله
بصوا بقى كان عندى مدرسة معايا فى شغلى الاولانى هى صراحة اللى ادتنى فكرة الدراسة دى ميس زينب ربنا يبارك فيها يارب
المهم فكرت انى انفذ الفكرة فعلا وبدأت اعرض على ادارة المدرسة وتفضلوا مشكورين بالموافقة ... طبعا مدرستى اسمها زهراء الاندلس
ادخلوا على موقعها لو حد عايز يتعرف على نشاطتها اكتر
بعد موافقة المدرسة جاء دورى انا بقى ... اصلا انا بعيد عنكم لا افقه شيئا فى شارع المعز اه و الله ماكنتش اعرف ولا حاجه هناك الا لما روحته زيارة مع الكلية بتاعتى ايام سنة تانية ولفيناه ولم يعلق فى ذهنى الا معلومات قليلة اللى هى اسماء الاماكن و بعض المعلومات عنها فقط وماكنش ينفع انزل بالمعلومات دى مع تلاميذى فقررت انى انزل المكان و اعمل دراسة فاحصة ماحصة للمكان قبل نزولى مع الولاد
وقد كان اخدت معايا بابا و اختى مرة و لبنى و نسمة مدرسات معايا و صحابى مرة تانية وزرت الاماكن اللى انا عايزاها و درستها كويس
وجاء يوم الدراسة كان يوم السبت السابع عشر من ابريل



دى البوابة الصالحية انشأت فى عهد الملك الصالح نجم الدين ايوب

دى قبة الملك الصالح نجم الدين ايوب انشأتها زوجته شجرة الدر تخليدا لذكراه القبة بتحتوى على ضريح الملك و قاعة واحدة كانت مخصصة لتدريس المذهب المالكى

دى بوابة مجموعة السلطان الناصر محمد بن قلاوون والمجموعة بتضم مدرسة و بيمارستان (مستشفى) مسجد وضريح
كان الناصر محمد قد خلع من حكمه بفعل الملك العادل كتبغا وبدأ فى بناء هذة المجموعة الذى تولى فترة ثم عاد الناصر بن قلاوون مرة اخرى للحكم ... ثم حدثت حادثة اشتباك بين المسلمين و المسيحين و قام الناصر محمد باطلاق جنوده للسلب و النهب فما كان منه الا ان استكمل بناء تلك المجموعة تكفيرا عن فعلته بناءا على وصية الشيوخ له

دى صورة المدرسة التابعة لمجموعة السلطان قلاوون وهى عبارة عن صحن مكشوف و اربع ايوانات الجزء اللى الولاد و مستر محمد قاعدين عليه دا كان سبيل المياه اللى موجود فى الصحن المكشوف وكان بيستخدم فى الوضوء و الحجرات الصغيرة اللى وراهم دى كانت حجر التعليم زى الفصول دلوقتى و الدور التانى من المجموعة كانت مخصصة كمنازل لطلاب العلم و العلماء فى المدرسة



ودا ايوان القبله ( ايوان يعنى المبنى الذى يقام على اربعة اعمدة و يكون الضلع الرابع مفتوح ) وبيضم المنبر وهو اكبر ايوانات المدرسة و المسجد

دى بقى البيمارستان الخاصة بالأمراض العقلية و العظام الجزء دا الغرف اللى كانوا بيحطوا فيهم المرضى النفسيين

ودا الجزء الخاص بمرضى العظام
دى خانقاه و مدرسة السلطان برقوق ...السلطان برقوق قبل وفاته طلب ان يدفن فى هذا المكان فقام ابنه ابو السعادات فرج ببناء هذة المجموعة وتضم مدرسة و ضريح و سبيل مياه و خانقاه ( استراحة ) للصوفيين و طبعا بناءها على نفس الطراز عبارة عن صحن مكشوف و اربع ايوانات ... اللى فى الصورة دا ايه ؟؟؟؟ ايون ايوان القبلة وفيه منبرين المنبر الخشبى اللى ورا دا و منبر حجرى اللى هو من الرخام الابيض دا و المنبر الخشبى الى بناه هو السلطان قايتباى صاحب قلعة الاسكندرية

وكالة بازرعة ... ايون ماحدش يضحك هى اسمها كدا ... الوكالة كانت زى مول تجارى لبيع الاخشاب تم بناؤها فى القرن الحادى عشر الهجرى - السابع عشر الميلادى على يد احد تجار المغرب اسمه حسن كتخدا ويلقب بكخيا عشان كدا اطلق على الوكالة اسم كيخيا فى الاول و فى القرن التاسع عشر الميلادى اشتراها محمد بازرعه تاجر من اليمن و اطلق عليها اسمه و اصبحت الوكالة خاصة ببيع الصابون و التومباك ( نوع من المعسل ) عشان كدا الشارع اللى موجودة فيه الوكالة اسمه التمبكشية نسبة للتومباك و الشيشة اللى كانت بتصنع فى الشارع دا وحتى الان على فكرة ... الوكالة الدور الارضى منها مكونة من خمسة و عشرين حاصل ( مخزن ) اللى هو الابواب الصغيرة اللى تحت دى اما الدور الاول موجود فيه خمسة و عشرين محل تجارى لعرض البضائع ... الادوار اللى بعد كدا بقى مكونة من فيلات حوالى تسعة عشر فيلا اللى هى المنازل يعنى لان التاجر ماكنش بيجى لوحده كان بيجى مع اسرته لان التجار كانوا من الدول العربية فكانوا بيجوا يقعدوا كتير .... كل بيت كان بيبقى ثلاث طوابق ... طابق للاستقبال و الثانى للاطفال و الخادم و الثالث للزوجة ... اللى عجبنى اوى انهم كانوا عاملين حجرة صغيرة كدا تستعمل كثلاجة لانها بحرى و الهوا فيها شديد فكانوا بيحفظوا فيها اللحوم و الخضار بتاعهم و الحجرة دى خاصة بالوكالة كلها يعنى مش فى كل بيت

دا بقى بيت السحيمى ... البيت دا من جزئين موصول بينهم بالجزء الخشبى اللى فى النص دا فى الصورة البيت مسمى على اسم اخر سكانه محمد امين السحيمى صاحب رواق الاتراك فى الازهر البيت مكون من طابقين الارضى منهم اسمه السلاملك عشان استقبال الرجال اما الدور الثانى اسمه الحرملك لاستقبال النساء

دى بعض الادوات اللى لاقيناه فى بيت السحيمى وكانت فى غرفة استقبال النساء عبارة عن مكواة و اله لطحن البن

بس كدا خلالالاص طبعا اللى هيدخل هنا هيدعى عليا لان البوست طويل اوووى معلش خليها عليكم بقى

تعليقات

‏قال мαησηα
اقولك على سر يا اوختى انا اول مرة اعرف ان فيه شارع اصلا اصلا اسمه شارع المعز ف شهر مارس اللى فات ههههههههه
شفت صور ف معرض عجبتنى اوى الصور لكن باذن الله هازوره وبما انك بقيتى مرشد سياحى مية مية هابقى ارتب معاكى وابقى سائحة وانتى عليكى فسحتى انا بقولك اهو
جميلة الدراسة بجد والصور شوقتنى ليه اكتر

تسلمى حبيبتى ويسلم مجهودك وفكرتك
‏قال جارة القمر
مانونا

ههههههههههههه ليه كدا يا بنتى بس ال مرشد سياحى ال احنا كدا هنته سوا

لا بجد اى خدمة انا بقيت مية مية فى الاماكن دى نبقى نعمل لقاء هناك وافسحك فسحة جامدة
شارع المعز من الاماكن القليلة ال بستريح نفسيا اوووووي فيها.... بحب اروح اتمشي فيه من وقت للتاني...
بحس بجمال القاهرة القديمة.. ورقي الناس وقتها...


شكرا ليكي..
‏قال جارة القمر
ابو على

تصدق كلامك صح فعلا ترتاح فيه نفسيا اووووى منورنى دايما يارب :):)
ومنكم نستفيد بجد هايل وعرفت معانى كلمات كتير
وابقى فضفضى كلنا صدورنا واسعة ليكى بس :)
ومستنى البوست ال جاى تفضفضى عن الجواكى ونتتاقش فيه كلنا
‏قال كلمات من نور
داه بوست اسميه بجد خمسة سياحة

تسلم إيديكي وعنيكي كمان

ممكن أنزل البوست داه في منتدى المدونيين.؟

http://mhg1962.ba7r.org/forum.htm

في انتظار موافقتك علما بإني حانزله بعنوان مدونتك طبعا ...تحياتي
‏قال جارة القمر
قلب بيتعب عشان حبيبه

ربنا يكرمك ميرسى لذوقك جدا ...ربك كريم :)
‏قال جارة القمر
كلمات من نور

يا خبر حضرتك بتستأذنى .. حضرتك تاخدى البوست بصاحبته كمان :):) بس ابقى ادينى لينك الموضوع عشان اشوف ردود الافعال
ميرسى لحضرتك جدا جدا ومنورانى دايما يارب
‏قال كلمات من نور
جارة القمر

تم وضع جزء من موضوعك على الرابط التالي

http://mhg1962.ba7r.org/montada-f13/topic-t997.htm#4194

ووضعت رابط الموضوع حتى يتمكن القراء من زيارة المدونة والتجول بين الصور..


اعتقد لابد من تسجيلك في المنتدى لرؤية القسم الخاص بالتدوين فهو على ما أظن للأعضاء المدونيين فقط...تحياتي
‏قال جارة القمر
كلمات من نور

تم يا فندم سجلت معاكم هناك ومبسوطة ان الموضوع عجبك كدا :):)
‏قال Timo..
جارة القمر...
بجد معلومات كتير قوي وصور حلوة وكاني بازور المكان حته حتة..
وحسيت قد ايه المكان ممكن يكون مريح نفسيا. :)
‏قال جارة القمر
تيمو

الحمد لله ان الموضوع عجبك وهو فعلا مريح نفسيا

المشاركات الشائعة من هذه المدونة

مقتطفات اعجبتنى २ - شهرزاد الخليج

الرجالة دول جزم بس المشكلة ان الستات مابتعرفش تمشى حافية!!!!!!