respect


سؤلت هذا السؤال من احد تلاميذتى

انتوا دايما تقولوا لنا احترم نفسك .. هو اصلا يعنى ايه احترام ؟؟

صدمت من السؤال لسببين اولهما انى لم اتوقع سؤال كهذا
ثانيهما انى صعقت ان طالب فى الصف الاول الاعدادى لسه مش فاهم يعنى ايه احترام!!!!
احسست ساعتها ان هناك ازمة تربوية فعلا فى مجتمعنا
هل السبب فى ذلك ان الامهات لم تعد تهتم باولادها كما كان الامر فى السابق وانا لا اعتقد فى هذا الامر

ام هو تغير طبيعى و تطور فى اخلاقيات المجتمع تبعا للتغير الاقتصادى الموجود حاليا فاصبح هم الاب و الام كفالة معيشة متوسطة للابناء دون الالتفات الى اهمية تربية عقولهم على ملئ بطونهم !!! ام هو التطور الطبيعى لتعلقنا بالغرب و تقليدنا الاعمى له فى اكثر المظاهر التى لا تساعد على بناء شخصية ابنائنا .

هل الحل ان تعود الام مرة اخرى الى البيت و يتحمل الاب وحده تكاليف الحياة و مصاعبها خارج البيت و تتحمل الام تكاليف الحياة و مصاعبها داخل البيت ... لا انكر انى ممن يفضل ذلك لانى لا ارى ان حرية المرأة يجب تحديدها داخل اطار العمل ... ارى ان حرية المرأة فى حرية اختيارها مع الاخذ فى الاعتبار ان الحرية يجب ان تكون حرية مسؤلة تبنى على مصلحتها و مصلحة من حولها بمعنى ان كان العمل يضر بمستقبل ابنائها فعليها ان تضحى هى بمستقبلها و يكفى ما وصلت اليه من نجاح لا ارى ان فى ذلك عيبا ولا عنف ذكورى نحو المرأة وانما هى الطبيعة التى يجب ان ننحاز اليها اذا تتطلب الامر ذلك ... و اعتقد ان ذلك ما يحدث بالفعل فى كثير من الاحيان

ما هى المشكلة أذن ؟؟؟ من وجهة نظرى الشخصية ان الازمة الحقيقة فى ثقافة التربية فى المجتمع الشرقى ... الاختلاف الكبير فى التفكير بين الابناء و الاباء و ما يترتب على ذلك من تباعد كبير بين الطرفين الذى يؤدى فى النهاية الى اخراج جيل لا يدرى الكثير فى الحياة
حيث ان الاباء يضعون اطار معين لابنائهم و يحاولون وضعهم فيه بشتى الطرق و بالتالى تقابل محاولاتهم بكل الرفض من الابناء ... ارى انه من الافضل ان يقتنع الاباء بشخصيات ابنائهم و ان وجد بعض العيوب فمن الطبيعى محاولة تقويمها دون التعرض لفكرة قولبة الابناء داخل قالب واحد غير خاضع للتغير و التنوع

من ضمن الاسباب التى اراها سببا فيما وصلنا اليه من الازمة التربوية انه بالفعل الظروف الاقتصادية التى نمر بها لها اليد الطولى فى ذلك فاذا تصورنا حال اسرة تعود الام من عملها و كل همها تحضير الطعام و تنظيف البيت و مذاكرة الدروس للابناء و الاب ليس احسن منها حالا فهو يعود الى المنزل متأخرا لعمله عملين فى وقت واحد ليعيل اسرته ... اين وقت التربية فى ذلك ؟؟؟ متى يجلس الاب و الام مع ابنائهما ليقرأوا سويا كتابا غير كتب المدرسة ... متى يتعلمون امور دينهم ؟؟ ... متى يتفرغ الاب ببال هادئ ليتفهم شخصية ابنائه و يساعدهم فى تكوينها بشكل صحيح

علينا ان نربى ابنائنا على الاحترام حتى يتعلموا ما هو هو الاحترام ... عندما تضرب ابنك اعلم انك تنتقص من احترامه و تعطى له الفرصة

ان يكون شخص لا يهتم باحترامه و احترام الاخرين

عندما تقول له "هو انت اللى هتعلمنى ؟؟" اعلم انك تضع حدا لعقله و تفكيره

عندما تضع حدا لاحلامه فأنت تضع حدا لذكاءه

هناك دراسات علمية قالت ان هناك اطفال يولدون لديهم استعداد فطرى

لتنمية ذكائهم و لكن البيئة المحيطة بهم لا تساعدهم على ذلك

فتكون النتيجة طفل غبى !!!!!!

فأن أنشئت طفل محترم و بالتالى شاب محترم

لا يتلفظ بألفاظ خارجة ولا يتحرش فى الشوارع

يعلم تمام العلم ان احترام الاخرين جزء من احترامه لنفسه

يعلم انه لم يخلق ليعيش و يتزوج و يموت

ان اردت من ابنك ان يحترمك فعليك اولا ان تعلمه ماذا يعنى الاحترام


لا تدع ظروف حياتك تطغى على حق ابنك فى الحياة

تعليقات

‏قال Mo7ammed
يعنى ايه احترام ؟

سؤال لو جاوبنا عليه
وطبقنا الاجابة دى

هينصلح حالنا اكيد
‏قال عمرو
أضم صوتي لصوت محمد
:)
‏قال Mo7ammed
وانا كمان اضم صوتى لصوت محمد

:) :)
هههههههه
‏قال The illusionist
لالالالالالالالالالالالالالالالالالا
انا اول
‏قال The illusionist
انا مش هضم صوتى
عشان صوتى مش عالى
‏قال The illusionist
الموضوع ده تحفه
‏قال The illusionist
بجد روعه
اسلوبك ولا الكتاب الكبار
والقضيه اللى بتناقشيها بعد كما كتبتى فيها
بجد
اثرتى اعجباى قوى
خصوصا طريقه كتابتك
‏قال The illusionist
لالالالالالالالالالالالالالا
موضوع جاااااااااااااامد
‏قال Tamer Nabil
موضوع مهم جارة القمر


بجد زى ما قولتى فى مشلكة فى المجتمع وازمة ثقافة ونظرة غريبة الى غالب شئون الحياة يجب ان تتغير والا نستطيع ان نقول وداع لكل ما هو قيم فى حياتنا

الى الابد

مع خالص تحياتى
‏قال جارة القمر
محمد ، عمرو

وانا كمان بضم صوتى لصوتكم :):)
‏قال جارة القمر
The illusionist

ههههههههههه ال صوتك مش عالى ال قول الحقيقة بلاش كدب بقى كل الولاد صوتهم عالى

ميرسى لكلامك الكبير جدا جدا دا يا بنى كتاب كبار ايه بس دى مجرد كلام كدا و خلاص
‏قال جارة القمر
تامر نبيل

عندك حق ويارب نلحق نعمل حاجه
‏قال ponpona
أنا شرفت .. تاتاتاتااااا

تعرفي .. والله الولد اللي سأل ده عنده حق لأنه قرر يفهم ودا حاجه مش بقت بتحصل

بس عارفه بردو .. اهو زي مانتي قولتي كده تقريبا ، في الغالب مافيش حد بيقعد مع ولاده خمس دقايق يكونو مخصصين بس لمساحه من الود والتفاهم ، احنا مفهوم المناقشه عندنا مدمر تماما ، ودي ابسط حاجه .. لما الحد الكبير مايحترمش فكر الناس الاصغر منه لـنهم أصغر منه وبالتأكيد هو يعرف أحسن فبتكون النهايه ان هو اللي بيفرض رأيه بالذات لو في موقع يسمحله بده .. والجيل اللي طالع مايعرفش اصلا ايه هيا مبادئ احترام الرأي المقابل والتخلي عن سادية الرأي .. لن يعرف معنا لأشياء أخري

يارب تكوني بخير
:)
‏قال ponpona
ممممم

طيب انا جيت قولت رأيي .. وعايزه أرغي شويتين .. ممكن؟
أكيد طبعا يابونبونتي ممكن

انت اخبارك ايه بقي ؟ آه بالمناسبه صحيح عشان فاكره اقولك من زمان وكل مره انسي .. اييييه حكم السن بقي تعملي ايه ، كنت هاقول ايه بقي؟ .. كنت هاقول ايه بقي ؟ ييييه .. نسيت .. طيب .. ابقي فكريني تاني :(
طيب ارغي في حاجه غير اللي انا نسيتها دي!!
طيب ماهو ما فيش في دماغي حاجه دلوقتي :(

ممم .. ممممم .. ممممم
بردو مش فاكر :(
‏قال جارة القمر
بنبونة النونة كونونة

وحشتينى جدا بجد

اه هو برافو عليه انه سأل بس المشكلة ان الكلام مش دايما بيجيب نتيجة يعنى الافضل تبقى ممارسة يعنى لو البيت عنده كان فعلا بيمارس فعل الاحترام ماكنش سأل يعنى ايه احترام

نيجى للرغى ممممممم اقولك يا ستى انا الحمد لله تمام بس تعبانة شويتين لكن تمام يعنى الامور ماشية ... ايه اخبار سيادتك بقى و بعدين بقى انا عايزة ميلك مش ليا دعوة :(:(
‏قال Somaya Kamal El Din
كلام معقول وصح مقدرش اقول حاجة عنه
هههههههههه

لا بجد البوست حلو اوووى وصح
وبيعالج نقطة مهمة اووى بتعانى من خلال فى مجتمعنا من كل الفئات مش الاطفال بس

وشغل الست او حتى شغل الست والراجل اغلب اليوم مش مبرر

لانه لو فضى لولاده حتى ساعة كل يوم
هما هيقدروا ان ظروف شغله متسمحش
‏قال جارة القمر
سمية

هههههههههههه ايون طبعا كلام جميل مش كلامى ولا ايه

الشغل فعلا مش مبرر لاننا اصلا بنعمل حاجات كتير فى حياتنا ايه المشكلة نفضلا شوية لاولادنا
‏قال Yusuf
دي تعتبر دراسة لكلمة احترام

احييكي عليها

ومعلش الفترة اللي فاتت مكنتش موجود عشان ظروف الدراسة

تحياتي
‏قال جارة القمر
يوسف

عاش من شافك قلقتنى يا بنى

دراسة ايه بس دى مجرد رأى شخصى ميرسى لمرورك و ربنا معاك فى الدراسة يارب
‏قال The illusionist
جارتى
انا اسف
وانا برد
الرد انقطع
والنت فصل
‏قال The illusionist
بس انتى قولتى ظروف التربيه
وفكر مجتمعنا الشرقى
والذى منو
بس انتى ايه رايك فى فكر الغرب
متفتح بغباء
صح
وانتى طبعا تقصدى
ان الواحد يتفتح بس بحدود
كلمه جميله قوى
تفتح بس بجدود
صعب يا جارتى خالص
صعب والله
فاكره افلام عربى بتاع زمان
لما الصعايده ييجوا مخبيين بناتهم
عشان محدش يشوف وشهم
ويتجوزوا وميشوفوش الشارع غير كل قد ايه
والكلام ده
طيب لما تفتحوا يا ستى
شوفتى المصايب الموجوده حاليا
شوفتى لما الدوله عازت تتفتح
نيلتها وخربتها
طيب لما الولد يخرج من منظومه والده
ويتطبع لمنظومه الدوله
ويلاقى ده تفتحها
ويعرف ان فى تفتح اكتر
الولد بيكبر ومعاه شبه زوجه فى امريكا
بس مش زوجته طبعا
وبيستمتع بحياته بكل الطرق
يشرب حشيش
يخرج مع زمايله
عندهم حفلات تخرج
لما الشاب المصرى شاف كده فى افلامهم
مش حس بالاحباط
وحس بالقهر
ويقول
اشمعنى هما واحنا لا
وبالتال اتجهنا للتقليد
هالويين
اعياد راس السنه و حفلات تخرج فى الكليات
وجيرل فريند بقت فى مصر


ايه اللى بقوله ده كله
ملوش قوى علاقه بالموضوع
طلكن هل فعلا
لو الاب خرج ابنه من الفكر الحالى
واخضعه لفكر متطور
هل هيخلق منه شاب سوى
فى خلال هذا العالم
هل فكر الاسره كمان
لو تفتح
يا ترى
هيتفتح للافضل
ولا للاسوأ
‏قال The illusionist
ده ردى
قوليلى رايك بقى
‏قال جارة القمر
هو انت ردك و مواضيعك لازم تبقى موطولة كدا عاااااااااا بنسى يا بنى اللى عايزة اقوله

شوف انا فى اخر البوست قلت ايه
لو الاب عايز يطلع ابنه محترم لازم يعرفه يعنى ايه احترام
الحرية مش انك تشرب حشيش و تمشى مع بنات .. دا اللى اقصده بقى اللى بيعمل كدا يبقى مش فاهم اصلا يعنى ايه احترام ويبقى اصلا اهله ما بذلوش الوقت الكافى لتعليمه يعنى ايه احترام عشان لما يجى الوقت اللى لازم ياخد فيه حريته و يفكر لوحده بعيدا عن فكر والده و اهله يبقى عنده حصيلة و مخزون ياخد منهم و يعرف يظبط حياته ازاى مش يمشى ورا تقليد اعمى ولا يبقى الموضوع مجرد فسحة مع بنت و هكذا

المشكلة فى التربية المغلقة انك بتقفل عقله كمان فلما بيخرج للحياة مش بيبقى فاهم الصح فيين و بيتخبط كتير اوى لحد ما يفهم الصح فين و دا اللى بيحصل فى المثل اللى انت بتقول عليه اللى هما الناس اللى جايين من الصعيد و زى العرب لما بيجيوا هنا مصر و غيرهم و غيرهم الامثلة كتير
لانهم حاسين ان الاحترام مفروض عليهم اى كان شكل الاحترام بقى من وجهة نظر كل مجتمع يعنى الصعيد وجهة نظرهم فى الاحترام ان ماحدش يشوف البنت و العرب ان المرأة تلبس النقاب فى بلاد معينة طبعا ... هما بينفذوا الاوامر مش اكتر لكن مش عشان هما عايزين يعملوها لكن يا ترى لو فهموا هيبقى ايه الحال بقى ؟؟ اظن هتختلف كتير اوووى
هتلاقى البنت لما تخرج من بيتها و تروح الجامعة مش هتغير سلوكها و طريقتها و هتتعامل زى ما مقتنعة مش زى ما هى متربية و فى فرق كبير بين الاتنين
‏قال adel
مممممممم

اعتقد ان سؤال طفل عن الكلمة دي
ردها الوحيد لا تعليق
ولا تعليق علي حاجات كتير قوي قوي

ادي اخرة اللي وصلنا له
‏قال جارة القمر
عادل

مممممممممم طيب لاتعليق برضو
‏قال Timo..
ببساطة انت لمست جزء بقابلة كل يوم من خلال شغلي وطووول الوقت باقول انه الناس محتاجة تتربي الاول قبل ما تخلف اطفال عشان تعرف تربيهم.. وده طبعا نتيجة انعدام الذوق والاحترام اللي بقى في المجتمع..
‏قال جارة القمر
تيمو

نورت ... هو فعلا نتيجة انعدام الاحترام
‏قال Heba Gamal Emara
كلام جميل
كلام معقول
مقدرش اقول حاجه عنه :):):)

انتى عارفه عندنا فى الجامعه حمله اسمها حمله "احترم نفسك"

اه والله
:):):)
‏قال جارة القمر
هبة

هههههههههه انت اللى هتغنى يا منعم

الحملة دى لابد ان تعمم
‏قال The illusionist
اه كدا انا فاهمك
تقصدى الاقتناع

هيولد الاحترام والعمل الصادق
فهمتك
‏قال أحمد شريف
السلام عليكم
حقيقة موضوع محترم ورسالته قيمة

هو أعجبني وودّت لو أكتب الكثير لكن نزلة البرد هشمت جسدي وتجرني على القيام لكن لي عودة إن شاء الله

أدام الله لنا قلمك

المشاركات الشائعة من هذه المدونة

مقتطفات اعجبتنى २ - شهرزاد الخليج

الرجالة دول جزم بس المشكلة ان الستات مابتعرفش تمشى حافية!!!!!!