احلى يوووووووووم فى حياتى


عمرك عشت عيد مختلف .. اه مالك بتبوصلى كدا ليه


اه مختلف حاجه جديدة عمرك ما عشتها بتجربها لاول مرة فى حياتك


العيد السنة دى مختلف بالنسبة ليا مختلف اوى


انا هعيد مرتييييييين يا جدعان


عيب على فكرة انا سامعة ناس بتوقل ايه المجنونة دى


اى و الله هعيد مرتين


انهارده فى المدرسة زهراء الاندلس كان اليوم المفتوح و كما هو متبع فى المدرسة


بيحاولوا يربوا اولادنا على قيم و اخلاق حلوة و كمان يعلموهم تعاليم من الدين


تعالوا بقى احكى لكم اليوم كان عامل ازاى


اولا استقبل المدرسين اللى انا واحدة منهم طبعا التلاميذ كانت حوالى الساعة 8 كدا


و بعد كدا طلعت المدرسات مع البنات الى الروف للاستعداد للاولى فقرات الحفل


و بقى المدرسين مع الاولاد فى الحوش الارضى


ايه هى بقى اولى فقرات الحفل ؟؟ سؤال وجيه


اننا نلعب مع الاطفال و نغنى و نضحك لمدة سااااااااعة و نص تصوروا نفسكم مع الاطفال و ضحك و لعب لمدة ساعة و نص


بجد كانت تحفة لعبنا بالبلالين و لعبنا لعبة المنديل (معرفش تعرفوها ولا لأ ) و عملنا سباق جرى و لعبنا شد الحبل


طبعا طبعا اللى كان بيلعب ميييييييييين ؟؟؟ المدرسات و اولياء الامور و البنات طبعا ... اى و الله لعبت شد الحبل و لعبت بالبلونة


و كأن الواحد عايز يعيش الطفولة حتى و هو كبير .... اخر نص ساعة نزلنا الفصول عشان الاولاد تفطر و بدأنا نتكلم معاهم


عن اداب العيد و ايه اللى المفروض المسلم يعمله اول يوم ... و بعد كدا كان فى مدرسة تطوعت تكون كورال سريع كدا و بدأوا يغنوا


اناشيد حلووووة اوووووووووووى عن العيد استنى هقولكم واحدة منهم بس يا بنى انت و هو ال صوتى وحش ال





زينوا الحرم و الحرم لنا و بأرض الحرم ضوفنا و صلينا


و الكعبة لمين


لله رب العالمين و الطواف لنا


زينوا الحرم و الحرم لنا و بأرض الحرم ضوفنا و صلينا


و المقام لمين


لسيدنا ابراهيم و الصلاة لنا


زينوا الحرم و الحرم لنا و بأرض الحرم ضوفنا و صلينا


و زمزم لمين


لسيدنا اسماعيل و الشرب لنا


زينوا الحرم و الحرم لنا و بأرض الحرم ضوفنا و صلينا


و الصفا لمين


و المروة لمين


لسيتنا هاجر و السعى لنا



اللى عايز يسمعها يدخل هنا



بعد كدا بقى نزلنا للفناء الارضى مع المدرسين و الاولاد و تبدأ الفقرة الثانية و بجد كانت احلى فقرة عشتها

مناسك الحج ... صدق او لا تصدق هو دا اللى حصل ... المدرسين عملوا مجسم للكعبة و عملوا لوح ارشادية كدا

لجبل الصفا و جبل المروة و جبل عرفات و بدأنا نوقف الولاد و البنات صفوف لبدأ مرحلة مناسك الحج

بدأنا بالطواف حول الكعبة و نحن نردد لبيك اللهم لبيك ... لبيك لا شريك لك لبيك ... ان الحمد و النعمة لك و الملك

لا شريك لك ... و تبدأ بعد ذلك السعى بين الصفا و المروة ... ثم الوقوف بعرفات و القاء الخطبة و العودة لطواف الوداع

حول الكعبة و نقف للدعاء ... بجد انا ساعتها دموعى نزلت مقدرتش كان موقف حلو اووووى



تبدأ بعد ذلك الفقرة الثالثة من الحفل و هو الذبح ... أتت المدرسة بعجل و بدأنا الذبح و الاطفال يرددون ورأنا بسم الله

و على سنة رسول الله ... و تقطع و توزع على الفقراء فى المنطقة كلها



بجد كان موقف مهيب اوووى احلى حاجه ان الاولاد خرجوا من اليوم دا عارفين مناسك الحج و عارفين ليه الذبيحة و عشان ايه بندبح

و ازاى الطريقة الشرعية فى الذبح ..... اليوم دا انا عمرى ما هنساه ... بجد جزاكم الله خيرا

عرفتوا بقى انا هعيد مرتين ليه انهارده مرة و بعد كام يوم هعيد تانى
جزاكم الله لكل من قام على هذا الحفل و اضفى عليه من روحه

تعليقات

‏قال adel
هاااييييييييه بقولك انتي
كووووووووووووول سنة و انتي طيبة
وعيــــــــــــد سعيـــــــــد

وبجد يوم لذيذ بس اول مرة اعرف ان في مدارس بتعمل كده .... اكيد مدرسة خاصة و اسلامية ... معتقدتش الحكومة تتطورت لكده :)
دول مبيدوش علم عشان يركزوا علي الاخلاق
بس بجد كويس ان في حد لسه بيهتم بالجانب ده في الاطفال
‏قال جارة القمر
و انت طيييييييييييب و عيد سعيد عليك انت كمان

اكيد مدرسة خاصة طبعا و الحمد لله بيهتموا بالاتنين علم و اخلاق او بنحاول يعنى يبقى الاتنين معا
‏قال TWEETY
انا اخدت شهادة تقدير

بس حلوة الصورة اللى حضرتك حضاها

كل سنة وانت طيبة
‏قال جارة القمر
مبروووووووك يا جميلة على شهادة التقدير وميرسى يا جميلة انتى احلى
‏قال Roqaya
ايه دة هو فى مدارس عندنا بتعمل كدة :D بجد فكرة جميلة أوى ربنا يجازيكم كل خير
كل سنة وانت طيبة وان شاء الله تعيدى خمس وعشر مرات كمان مش مرتين بس
وكل مرة تبقى أجمل من اللى قبلها :)
‏قال شاب فقرى
ربنا يسعد ايامك

انا قريت

بس دماغى فيها الف حاجة

هاجى اعلق تانى :)

شاب فقرى

انا بخير

وتمام :)

انا من الناس اللى مينفعش يتقلق عليهم

شاب فقرى
‏قال جارة القمر
لالا انا كدا ليا فى ذمتك تعليق انا قلت اهو

و يسعد ايامك يارب و تكون دايما بخير
‏قال جارة القمر
روقية

سوى يا جميلة ماخدش بالى من تعليقك
اه و الله فى مدرسة بتعمل كدا مدرستى حبيبتى ويجازينا كلنا خير يارب
‏قال مجرد انسان
جميل الاحتفالية دى

دى بتقرب كتير كمان بين الطالب والاستاذ


تحياتى
‏قال جارة القمر
مجرد انسان

اكييييد بتقرب طبعا و ليها مفعول جامد جدا و الله
‏قال ponpona
اللــه

والله مدير المدرسه وانتي وكل حد شارك في اليوم دا بيفهم ... سلميلي عليهم كلههم وقوليلهم منى بتقولكو ربنا يخليكم

تعرفي بقي انا ايه اللي مزعلني .. انا عمري ماصليت العيد .. تخيلي !!
عندي 19 سنه وعمري ماصليت العيد :( علطول علطول كل سنه بنسافر وهناك المسجد نونو ومافي مساحات حتي تتعمل ساحات للصلاه :( :(

بس عامه .. حصل خير أكيد في يوم هتبقي ماكتوبالي ان شاء الله

كل سنه وانتي طيبه وبخير يا بسبوسه

:))
‏قال ponpona
اييه دااا
هي المدرسه اللي انتي بتشتغلي فيها في فيصل اللي جنب الهرم والعشرين ولا فيصل تانيه؟
‏قال جارة القمر
بنبونة

ان شاء الله تصلى العيد اكيييييد بس حاولى دى فرحة يا بنتى

وانا وصلت سلام الناس كلها اللى دلخت هنا و الله

اها هى اللى جنب فيصل فى العشرين اشمعنى ؟؟
‏قال Tamer Nabil
ازيك جارة القمر

كل سنة وانتى طيبة

عيد سعيد


حلو الاحتفال ومهرجان العاب دة مع الاطفال بهجة وفرح وبيكون لية رد مفعول طيب على قلوب الاطفال الحلوين

مع خالص تحياتى
‏قال جارة القمر
تامر

ميرسى لمرورك و كل سنة وانت طيب

اكيد كلامك مظبوط طبعا
‏قال فراشة
بجد يوم جميييييل قوي
يابختك ربنا يسعدك يارب

انا بقى بلعب مع قرايبي الصغريبي
بيجولي مصوص ويقولولي يالا نلعب يا ابله مني أقولهم بلاش ابله بقى دا انا قدكم هههههههه وضحك وهزار ولعب
بجد الطفولة احلى حاجة

ربنا يرزقك ذرية صالة يارب
‏قال جارة القمر
فراشة اسعدنى مرورك

ههههههههه ايون انا كمان مش بحب كلمة ابلة دى ربنا يخليهم ليكى و يرزقك انتى ايضا الذرية الصالحة
‏قال Timo..
كل سنه وانت بالف خير وسعادة وهنا
‏قال جارة القمر
تيمو

وانت بألف خير و طيبة

المشاركات الشائعة من هذه المدونة

الرجالة دول جزم بس المشكلة ان الستات مابتعرفش تمشى حافية!!!!!!