مصر و اللى فيها


كنت فى فرح واحدة قريبتى

الفرح كان فى منطقة شعبية شوية

المهم انى حسيت الطيبة كلها هناك بجد

ناس كل همها تسمع اغنية تصقف و تشارك الناس فرحتهم و خلاص

رغم ان حالهم صعب و يمكن مش عارفين يعيشوا كويس

لكن لمجرد ان فى فرح كله بقى بيضحك و فرحان

غريب الشعب دا و الله

وانا مروحة لقيت عريبة كبيرة كدا و فخمة (انا معرفش فى نوعية العربيات)

ساعتها لقيتنى بقول جوايا مش هما دول المصريين

المصريين هما اللى انا كنت لسه عندهم

المصريين مش هما الناس الاغنياء اللى مش حاسين بحد

المصريين هما الغلابة اللى بيحسوا ببعض

بيشاركوا بعض فرحتهم و حزنهم

بيخافوا على بعض من اى حاجه

مصر هى النيل و الهرم

هى الشوارع بالليل و الهدوء ماليها

هى القمر و هو منور شوارعها

هى اخواتك و جيرانك لما يدافعوا عنك

هى الناس اللى تجرى عشان تساعدك لو حصل حاجه

بجد الاغنية بتاعت شيرين دى جامدة اوى

"ماشربتش من نيلها طب جربت تغنليها .. جربت فى عز ما تحزن تمشى فى شوارعها و تشكي لها"

حد جرب كدا فعلا تمشى فى شوارعها و تشكي لها ؟؟

تصدقوا انا جربت ... بحس ان كل حاجه فى الشوارع بتبطب عليا

و انا ماشية فى الشارع بحس ان البيوت بقت شبه اللى ساكنين فيها

لما بلاقى بيت نوره مولع كله كدا و الطلاء بتاعه لسه جديد بحس ان البيت بيرقص عشان اللى فيه لسه عرسان جداد

و البيت لما يكون مضلم شوية و لونه غامق من التراب بحس انه بقى شايل هموم الناس اللى جواه معاهم


بس خلاص مش فى كلام تانى يتقال رغم ان جوايا كتير اوى

تعليقات

‏قال Mano
شرفني فعلا اني اكون صاحب اول تعليق
عجبني كتير اللي مكتوب بس زي مانتي بتقولي رغم اللي فيها وياما شوفنا فيها حاجات حلوه وحاجات وحشه وناس فوق وناس تحت ومهما فيها انا من عشاق ترابها وبتمني يكون ربنا كاتبلي اني اموت وادفن فيها
‏قال جارة القمر
و يسعدنى انك تكون اول تعليق
ازيك يا مانو عامل ايه و ايه اخبارك؟
وانا اتفق معك رغم كل ما فيها بموت فيها وفى ترابها
‏قال Tamer Nabil
مصر بلدى حلوة وزى العسل

صحيح فى ناس لاتعرف بلد ولاوطن والاسم مصرى بس فى البطاقة

الا انة فى الكثير والكثير كما نقول اولاد بلد بجد

هما دول الصورة الحلوة هما دول الاصل المصرى اللى هيعيش الى اخر يوم فى الحياة

مع خالص تحياتى
‏قال جارة القمر
تامر
منور يا بنى فينك ؟؟

ايون هو ابن البلد دا تصدق جبتك الكلمة الصح ... ميرسى لمرورك
‏قال عمرو
أنا متفق معاكي يا جارة القمر في الجملتين الآخرانيين بس
:)
‏قال جارة القمر
عمرو هنا يا جدعان يا مرحبا يا مرحبا

و انا اتفق معك اكثر :)
‏قال Timo..
الله على التشبيه الجميل..
بجد احييكي بشده لانك وصفتي حلو قوووووي
تشبيك للبيوت الفرحانة والبيوت اللي شايلة هموم فكرني باغنيتي المفضلة لفيروز:
فيه باب غرقان بريحة الياسمين..
فيه بابا..مشتاق..
وفيه باب حزين..
وفيه باب مهجور..واهلة منسيين..
‏قال جارة القمر
تيمو

منووور يا بنى ربنا يخليكى على الكلام الجميل دا
‏قال ponpona
انتي اسمك مى يابسبوسه :)
والله فرحت .. أصل اسم مى دا اسم مسمسم ونونو خالص ، تحسي انه خفيييييف

متسجله تأخير كام بوست انا !!
امممممم .. شكلي كده اتاخدت غياب
عامة انا جيت اخدت لفه ف كل اللي فاتني

تعرفي ..
(مصر) ف حد ذاتها اللي هي البلد حاجه حلوه قوي وطيبه ..
آه والله ساعات بحس ان البلد طيبه
أما بقي بالنسبه لكل المشاكل اللي فيها دي
فاحنا اللي عملناها واهي ف الآخر بتلف تلف
وترجع علينا تاني

أقولك علي حاجه .. مش القاهره اهي اكتر مكان زحمه وخنقه وملوث ف البلد
بس لو شوفتيها الساعه 5 الفجر هاتحسي فعلا قد ايه هي هاديه وطيبه .. طيبه فعلا وقلبها كبييييير
‏قال جارة القمر
بونبونة الجميلة جت هيييييييييييه

انا معاكى و الله و يا سلام لو 5 الفجر عند النيل بجد انا بحب كل الاماكن هنا بحس انها جوايا

و مش متسجلة غياب ولا حاجه انتى دايما موجودة يا قمراية
شوفتى انت كمان وحشتينى وجاية اقولك تصبحى على خير ياقمر

وبكرة هقرأ الموضوع
وتسلميلى على الزيارة

بس بجد بتوه بينك وبين جارة القمر التانية :)
بس انتو الاتنين زى العثل
‏قال جارة القمر
وانتى من اهله يا قمر و انتى كمان وحشانى ... هو انا زورتك ؟؟؟ مش عارفة الصراحة ... بس انتى فعلا كنتى وحشانى و يا ستى ولا يهمك حتى لو بتوهى المهم انك بتعرفى الطريق من وقت لاخر
ايه الوطنية دى كلها امال بيقولوا محدش بيحب مصر ليه
‏قال جارة القمر
انا عارفة يا بنى ناس معندهاش دم هههههههههههههههههه ... ماحدش مش بيحب مصر على فكرة بس الناس دايما مش بتفرق بين الوطن و الحكومة
‏قال Yusuf
أيا كان اللي بيحصل

حلو كان أو وحش

بس مصر ليها طعم خاص

مش بحسه بجد غير لما بتكلم مع حد متغرب عنها

الحمد لله اني عايش في مصر

تحياتي
‏قال adel
انا اسف علي القلق اللي اتسببت فيه ليكي
وسؤالك ده فرق معايا كتير
بس هي كانت ظروف صعبة جدا و انا كتبت بوست وضحت جزء من الموضوع مش اكتر
وهحاول ارجع زي الاول
بس صدقيني مكنتش فعليا بفتح ابص علي اي حاجة ولا مدونة ولا ميل ولا اي حاجة :(
----------
علي اساس معاكي ميل بقي و تليفون :)

-----------
اسف بجد تاني
‏قال جارة القمر
يوسف

كلامك صح و الله ماحدش يحس الا اللى فى الغربة
‏قال جارة القمر
عادل
رديت عليك هناك
حمد لله على سلامتك يا انسان يا طيب:)
انا جيت اطل واسلم
حبيتك من تعليقاتك عند دولة العثل

كلامك جميل اوى والله بلدنا دى اجمل بلد ف الدنيا بس هى منهوبة
بغض البصر عن السياسة وقرفها

ارفعى ايديك معايا وخلينا كلنا ندعى انه يبارك ف بلدنا ويرفعها بينا ونكون احنا السبب فى تقدمها
قولى آآآآآآآآآآآآآمين

تقبلى مرورى وتحياتى
ياقمراية
اقول تصبحى على خير يا قمر

واكيد هاجيلك هنا تانى

وهاكون زبونة مستديمة هنا
بعد اذنك طبعا

تصبحى على خير
‏قال جارة القمر
بيطرية ومش بايدى

تسلمى على الزيارة يا جميلة وارفع ايدى مارفعش ليه بلدنا واحنا حرين ندعلها ندعى عليها ههههههههههه يااااارب تفضل بخير و تتحسن احوالها يارب

ومستنياكى تانى يا قمر
‏قال ahmedmisry
عفواً أنا مختلف معك كثيراً

المصري ليس الفقير فقط والغني لا يعيش بمعزل عن الفقير يا سيدتي

هناك من كل فئة الصالح والطالح .. هكذا الحياة وهكذا خلقها الله

وانظري كيف كان عبد الرحمن بن عوف وعثمان بن عفان رضي الله عنهما بغنائهما الفاحش !
ألم يوحي لك هذا بشيء

فكري من جديد بالأمر وستجدي أن فكرتك تلك كما أرى من وجهة نظري الخاصة فكرة مغلوطة

المشاركات الشائعة من هذه المدونة

مقتطفات اعجبتنى २ - شهرزاد الخليج

الرجالة دول جزم بس المشكلة ان الستات مابتعرفش تمشى حافية!!!!!!