هعيد و هفرفش بس من غير تحرش


هو : ايه يا مزة الجمال دا كله

هى : نظرة نارية من فوق لتحت و تمد فى خطوتها

هو : يمد شوية فى مشيته و يجذبها من ذراعها

هى : تحاول ابعاد يديه عنها


و البقية معروفة طبعا


دى تمثيلية صغيرة عارفة ان فى اوقح من كدا و اشد و اقبح من انى اقدر اذكره هنا

عارفين التمثيلية دى بتتعرض على اى قناة ؟؟؟؟



ها ؟؟ ماحدش عارف



اقولكم انا ..... قناة قديمة لكن جديدة فى نفس الوقت

مش عارفينها لسه

كل يوم بتشوفها ماحدش يقدر يعدى يوم من غير ما يشوفها

ايوة ايوة زى روتانا سينما كدا مش بتقدر تغمض عينيك

هااا؟ عرفتهاااااااا ؟

طب بلاش اقولك حاجه تانية .... على القناة دى ممكن تشوف اختك امك بنتك

اى حد من قرابيك او ممكن كمان تشوف بنت حتتك

بس خد باااااااااالك انت لما تشوفها هتشوفها فى موقف زى اللى انت قرأته فى اول البوست

ايوة يا عم مش تتخض ليه لأ ... طب بذمتك وانا راضية ذمتك ممكن ولا لأ

اظن دلوقتى عرفت القناة اللى بتكلم عنها

ايووووووووة هى دى


الشااااااااااااااارع المصرى


سبحان الله يا اخى الشارع دا دايما كنا بنمشى فيه واحنا مطمنين

مش خايفين من حاجه .... حتى لا قدر الله لو حصل حاجه

كنت بتبقى متأكد الف مين هيساعدك .. مش بقولك قناة قديمة

نخش بقى على الجديد اللى لسه نازل يدوبك من كام سنة

شوارع كلها خوف .. رغم انك بتشوف نفس المبانى و نفس المحلات

نفس الوشوش لكن مابقتش هى الوشوش تحس وانت ماشى كأنك شايف نظرة

"فان دام " و هو ناوى ينقض على واحد من اعداؤه فى اى فيلم ليه

زمان وانت نازل كان اكتر حاجه ممكن تخاف منها الحرامية اللى بتسرق

اى حاجه منك و تطلع تجرى .... دلوقتى بقى بقيت بتخاف من اللى ماشى جنبك

احسن يطلع من نوعية "ايه يا مزة الجمال دا" و ما خفى كان اعظم


ماما زمان واحنا نازلين كانت اقصى حاجه تقولنا عليها "خدى بالك من العربيات وانتى بتعدى"

دلوقتى بقى الوصايا العشر "ما تركبيش توكتوك ، ما تركبيش تاكسى ، ماتركبيش مايكروباص فاضى ، ما تخشيش شارع ضلمة"

كملوا انتوا بقى الوصايا ..... يا نهار ابيض كل داااااا انا اخدها موتورجل احسن بقى (يعنى اخدها مشى احسن)


من كام يوم قرأت فى جردية المصرى اليوم مقال بعنوان "التدين المغشوش" رغم ان المقال متحامل شوية على الدعاة الجدد

الا انه لمس حقيقة موجودة فعلا ان الشعب المصرى بقى متناقض جدااااا ... مش هو الشعب المصرى دا

اللى بيتفرج على القنوات الدينية و البرامج اللى بقت اكتر من الافلام و المسلسلات دلوقتى هو هو نفس الشعب اللى بيتحرش

بالبنات فى الشارع برضو ولا ايييييييييه و هو هو برضو اللى بيعاكس البنات و هو هو برضو اللى بيخطفهم

طب ازاااااااااى اومال قنوت ايه الدينية اللى بتتفرج عليها دى انا مش فاهمة .... طب يا ترى لو فعلا المواقف دى كانت

مع مامتك او اختك كنت هتستحمل كدا كنت هتروح تشكر اللى اتحررش بيها فى الشارع


عن طريق مدونة قوس قزح عرفت ان فى حملة معمولة اليومين دول الهدف منها التصدى للتحرش

و اتعمل للحملة دى جروب على الفيس بوك اسمه هعيد وهفرفش...بس مش هتحرش و طبعا فى كتير نشروا عن الحملة دى

وان كنت اعتقد لابد تعميم الحملة فلا تقتصر على الاعياد فالتحرش لا يقف عند الاعياد فقط .... ياريت كلنا نعمل حاجه فى الحملة دى

مش لازم تحط بوست عندك لكن اتكلم مع الشباب من اصحابك و اللى بيعملوا كدا


معلش جايز كلامى يبقى وحش و كئيب واحنا فى العيد كدا بس تنويه و كلام كان لازم يتقال .... و السلام ختام


تعليقات

‏قال adel
عند حق
خصوصا في جزئية ان الشعب اللي بيتفرج علي كل البرامج الدينية دي و مع ذلك التحرشو الانحدار الاخلاقي بيزيد قوي للاسف

الواحد مش عارف اخرها ايه
‏قال Mo7ammed
الدنيا بقت كده واتغيرت
نعمل ايه ؟
نصيحة كل بنت كده تتعلملها شوية سيلف ديفينس
والعملية تبقى متوازنة

ربنا يسترها على ولايانا يارب
‏قال جارة القمر
تصدق و الله انا لسه كنت هدخل المدونة عندك اسلم عليك و ارخم عليك شوية هههههههههههههه

ايش اخبارك و اهرامك و الحوادث كمان بالمرة

انا معاك يا عادل بس عشان ما نخرج من دائرة التعميم فى ناس بتتفرج على القنوات دى و بتعمل اللى فيها و متدينة جدا الحمد لله

لكن للاسف الاكثرية بيتفرجوا و خلاص لمجرد الفشخرة انهم اتفرجوا على دا

منور ياباشا و دايما موجود كدا
‏قال جارة القمر
محمد : لا اتفق معاك نعمل و نعمل كتيير كمان اشحال ماكنتش شاب اهو زى الفل و الورد كمان حاول يكون ليك دورك وسط الشباب

وربنا يسترها يارب
‏قال بنوته
السلام عليكم
حبيبة قلبي وحشاني مع اني لسه مكلماكي من شويه
بس برضه وحشتيني
معاكي حق يا قمر
كلامك صح وسليم 100%
علي فكره في برنامج اسمه صبايا
كنت بقلب كدا صدفه لقيته
كله حوااااااااادث من دي
لا حول ولا قوة لاا بالله
ربنا يهدي يااااارب
في رعاية الله
السلام عليكم
‏قال جارة القمر
بنوتة وانتى كمان يا قمر وحشتينى

الحوادث دى منتشرة فى كل مكان و دى المشكلة ربنا يعافينا
‏قال Mo7ammed
مانا ليا دور كبير اوى
دور استطلاعى انا ادور على البنت
وهم عليهم الباقى
ههههههههه

بصى ياجارة
الموضوع اكبر من اننا نعالجه لوحدنا
يعنى ممكن تيجى تعمل فيها جدع وبنت بيتحرش بيهاتلاقى البرنس اللى بيتحرش ده مطلعلك مطواة .. ممكن تلاقى ان اللى بيتحرشو جماعة مش واحد بس
ممكن تلاقى البنت نفسها بتقولك وانت مالك
وصدقينى بتحصل والله

الموضوع عايز تدخل امنى
يعنى مثلا حصل تحرش
يجيبو الواد اللى عمل كده
ويقبضو عليه
ويعاقبوه قدام الناس
مرة فى مرة
الموضوع هيتلم

اصلا موضوع التحرش ده كبيييييييير اوى واسبابه بالعبيط

علشان تحلى موضوع التحرش
يبقى لازم تحلى مشاكل مصر
‏قال Mo7ammed
وكمان موضوع البرامج الدينية
الشعب كله بيشوف برامج دينية
وكل بيت
بس تيجى تشوفى جوة البيت بيحصل ايه
الاب والام هم اللى بيشوفو

تلاقى الابن قاعد مع اصحابه
والبنت ففى اى حتة هى كمان

يعنى قليل بس مش اوى اما تلاقى كل الاسرة بتشوف برنامج دينى مع بعض


والله الواحد بيضايق اننا وصلنا لكده
الواحد يخاف لو اتجوز ولا حاجة مراته ولا بنته ولا اخته يحصلها حاجة زى كده
احنا بعد صلاة العيد شفنا مناظر

ربنا يرحمنا يارب
ربنا يصلح حال شبابنا جميعا
ياارب
‏قال adel
ههههههههههه
يامراحب بيكي
والحوادث بيسلم عليكي

وانا مقولتش كل الناس وحشة
معني كده اني انا كمان متحرش !!!!!
هههههههههههههه

ومش كل بنت بتتعاكس تستاهل ده و الدليل ان حنتي المنقبات مش بيسلموا من التحرش
‏قال جارة القمر
كلامك تمام جدااااااااا يا محمد و مش بقول اننا هنغير كل الناس لكن محاولة و اهى الالف ميل تبدأ بخطوة
‏قال جارة القمر
هههههههههههههههههههه
الله يسلمها و يسلمك

تمام كويس انك عارف كدا انا قلت انت اتجننت ولا ايه بتعترف على نفسك ادام عمو بتاع البلوجر ههههههههههههه
‏قال adel
لا مفيش متحرش بيقول علي نفسه
ده يبقي عبيط بقي
ههههههههههه
في البداية ربنا يساعد ويعين أي بنت يحصل معاها كده
وربنا يهدي أي شاب ممكن يعمل كده
والله ده كله بسبب البعد عن الدين
وبسب بعدنا عن ربنا
ولا حول ولا قوة إلا بالله
وإن كان فيه تناقدات بس أنا مش متفق معاكي إن اللي بيتفرجوا علي القنوات الدينية عم اللي بيعملوا كده
وبلاش نمشي ورا الجرائد الصفراء
صلي علي النبي
ايه ده بقى انتى رجعتى امتى

وايه التغير ده كله

بجد مش فاهم حاجة خالص

بس على العموم حمدلله على السلامة
‏قال جارة القمر
اللهم صلى على سيدنا محمد و على اله و صحبه اجمعين

عاشق الجنة انا مقولتش ان كل اللى بيتفرج على القنوات الدينية هما اللى بيعملوا كدا انا قلت ان فى تناقض فى المجتمع شديد جدا ... لكت اكيد طبعا فى ناس متدينة و محترمة جدا وماحدش يقدر ينكر دا
‏قال جارة القمر
طب انا حاسة كدا انك فكرانى حد تانى و الظاهر ان فى كتير واخدين نفس الفكرة برضو
‏قال عمرو
ليلة العيد وقفت تاكسي عشان أروح.. لقيت السواق بيسب ويلعن لما واحد كسر علينا كسرة جامدة حبتين.. قلت له يا أسطى صحتك, إنت لو هاتغضب من كل سواق يكسر عليك هايجيلك سكتة قريب.. قاللي "يا أستاذ فيه حاجة غلط النهاردة.. أنا لسة فيه واحد خبطلي العربية من الجنب من شوية, وكل شوية واحد يكسر عليا أو يخبط فيا.. فيه حاجة غلط".. قلت له أصل بكرة العيد وانت عارف إن الشعب يحب يفرفش, فمؤكد الشعب شارب ومحشش وضارب كل أنواع البلا.. المهم ما فيش دقيقة لقينا التاكسي اللي كسر علينا وقف عند شركة البيرة ونزل منه السواق عشان يمون للعيد. قلت له جالك كلامي؟!!
إحنا عندنا حب الانفلات زي ما عندنا حب الانصياع للدين..
كل سنة وانتي طيبة وآمنة على نفسك وعيلتك
ربنا يتوب علينا بقى
:)
‏قال جارة القمر
منور يا عمرو و الله
و الله يا بنى كلامك فى الصميم بجد ربتا يهدى الجميع

المشاركات الشائعة من هذه المدونة

مقتطفات اعجبتنى २ - شهرزاد الخليج

الرجالة دول جزم بس المشكلة ان الستات مابتعرفش تمشى حافية!!!!!!